Zdaroŭje

Padletki pjuć leki ad raku, kab stać vyšejšymi. Daktary bjuć tryvohu

Novy trend heightmaxxing nabiraje papularnaść u internecie, ale sposab, jakim niekatoryja chłopcy sprabujuć dadać sabie niekalki santymietraŭ rostu, surjozna niepakoić lekaraŭ. Z padrabiaznaściami znajomić Daily Mail.

Zdymak ilustracyjny. Fota: Naša Niva

Nievysoki rost dla mnohich chłopcaŭ-padletkaŭ stanovicca pryčynaj kompleksaŭ. U sacsietkach, dzie pastajanna abmiarkoŭvajuć źniešnaść i pryvabnaść, hetaja tema pieratvaryłasia ŭ asobny trend — heightmaxxing (ad anhlijskich height — «rost» i maxxing — «maksimalnaje pavieličeńnie»). Jaho prychilniki sprabujuć stać jak maha vyšejšymi, vykarystoŭvajučy roznyja srodki, u tym liku leki, jakija dla hetaha zusim nie pryznačanyja.

Asablivuju papularnaść siarod niekatorych padletkaŭ nabyŭ erdaficinib (erdafitinib), jaki jany nazyvajuć skaročana erda. Heta supraćpuchlinny preparat, viadomy pad handlovaj nazvaj «Bałviersa». Jon pryznačany dla lačeńnia peŭnych formaŭ raku mačavoha puchira ŭ darosłych pacyjentaŭ.

Ale ŭ sacsietkach raspaŭsiudziłasia infarmacyja, što hetyja leki nibyta dapamahajuć pavialičyć rost. I niekatoryja padletki vyrašyli pravieryć heta na sabie.

Tak, 17‑hadovy Džejms raskazaŭ vydańniu Rolling Stone, što pry roście kala 165 sm vielmi pieražyvaŭ praz svaju źniešnaść. U pošukach sposabu stać vyšejšym jon pačaŭ prymać erdaficinib.

Sa słoŭ chłopca, za dva miesiacy jon vyras prykładna na 7,6 sm. Ale razam ź mierkavanym vynikam źjavilisia surjoznyja pabočnyja efiekty: paznohci pažaŭcieli, z-pad ich pačaŭ vydzialacca hnoj.

Jašče adzin 17‑hadovy padletak, Zak, kuplaŭ preparat praź internet prykładna za $300 na miesiac. Jon taksama śćviardžaje, što staŭ vyšejšym, adnak sutyknuŭsia z mocnymi bolami ŭ sustavach i kryvaciokami z nosa. Urešcie chłopiec pačaŭ adkładvać hrošy na mahčymuju špitalizacyju, bo bajaŭsia surjoznych uskładnieńniaŭ.

Pry hetym niama niezaležnaha paćviardžeńnia, što rost abodvuch chłopcaŭ pavialičyŭsia mienavita dziakujučy lekam. U padletkavym uzroście čałaviek moža praciahvać raści naturalnym čynam.

Čamu padletki pavieryli ŭ dziejańnie preparatu?

Ideja vykarystoŭvać erdaficinib dla pavieličeńnia rostu ŭźnikła nie na pustym miescy.

U 2024 hodzie navukoŭcy apublikavali daśledavańnie, u jakim apisali niečakanaje paskareńnie rostu ŭ dvuch dziaciej, što atrymlivali hety preparat dla lačeńnia puchlin centralnaj niervovaj sistemy.

Erdaficinib błakuje receptary faktaraŭ rostu fibrabłastaŭ (FGFR), jakija ŭdzielničajuć u rehulavańni rostu i dzialeńni kletak. Mienavita tamu jon vykarystoŭvajecca ŭ lačeńni niekatorych puchlin.

Adzin z hetych receptaraŭ, FGFR3, taksama rehuluje rost kostak. U dziaciej i padletkaŭ jany padaŭžajucca dziakujučy zonam rostu — učastkam chrastkovaj tkanki kala kancoŭ kostak. Navukoŭcy vykazali zdahadku, što błakavańnie FGFR3 mahło vyklikać niezvyčajnaje paskareńnie rostu ŭ maleńkich pacyjentaŭ.

Adnak daśledavańnie nie dakazvaje, što erdaficinib moža biaśpiečna pavialičvać rost zdarovych padletkaŭ. Da taho ž paśla pałavoha vyśpiavańnia zony rostu kostak zakryvajucca, i preparat užo nie pavinien upłyvać na ich padaŭžeńnie.

Čym niebiaśpiečnyja takija ekśpierymienty?

Adzin z aŭtaraŭ daśledavańnia, dziciačy endakrynołah Vienskaha miedycynskaha ŭniviersiteta Adalbiert Rajman, papiaredžvaje, što erdaficinib uździejničaje na receptary, jakija prysutničajuć u samych roznych tkankach arhanizma. Tamu jaho doŭhaterminovyja nastupstvy, asabliva dla dziaciej i padletkaŭ, arhanizm jakich jašče raźvivajecca, zastajucca nieviadomymi.

Pry hetym surjoznyja pabočnyja efiekty preparatu dobra viadomyja. Jon moža vyklikać paškodžańni zroku, u tym liku niezvarotnyja, parušeńni abmienu rečyvaŭ, mocnyja boli ŭ kaściach i ciahlicach, prablemy sa skuraj i paznohciami. Mahčymyja taksama paškodžańni inšych orhanaŭ.

Vytvorca erdaficinibu, kampanija Johnson & Johnson, padkreślivaje, što preparat nie ŭchvaleny dla pavieličeńnia rostu, a jaho biaśpieka i efiektyŭnaść dla hetaj mety nie dakazanyja. Nie vyśvietlenaja i biaśpieka jaho vykarystańnia ŭ dziaciej i padletkaŭ.

Niahledziačy na toje, što ŭ ZŠA hetyja leki adpuskajucca tolki pa recepcie, niekatoryja padletki znachodziać sposab zamaŭlać ich u zamiežnych internet-pradaŭcoŭ.

Daktary papiaredžvajuć, što navat kali preparat sapraŭdy zdolny paskoryć rost kostak, niekalki dadatkovych santymietraŭ nie vartyja ryzyki atrymać niezvarotnyja paškodžańni zroku ci inšyja surjoznyja ŭskładnieńni.

Kamientary

Ciapier čytajuć

Na kancert Kadyšavaj u Minsku ŭ kakošnikach pryjšli navat mužčyny85

Na kancert Kadyšavaj u Minsku ŭ kakošnikach pryjšli navat mužčyny

Usie naviny →
Usie naviny

Va Ukrainie 14‑hadovaja školnica naradziła ad 60‑hadovaha mužčyny. Jana kaža, što jon dobry baćka, i prasiła nie karać jaho28

Taksista i byłoha achoŭnika «Jeŭraopta» z Baranavičaŭ abvinavačvajuć pa palityčnym artykule3

USU ŭdaryli pa Krymskim moście. Ruch transpartu spynieny15

Turysty nakidali ŭ fantan Trevi amal na 200 tysiač jeŭra mienš paśla taho, jak padychod da jaho zrabili płatnym4

Kitajski markietpłejs Temu sam prapanavaŭ biełaruscy supracoŭnictva, ale źliŭsia, kali daviedaŭsia jaje hramadzianstva13

Minabarony raskazała, jak nad Biełaruśsiu źbivajuć zabłukałyja drony2

Ź Janam Pamiedoram Reuckim raźvitalisia ŭ Varšavie

Kankurent Starlink straciŭ 40 spadarožnikaŭ: rakieta nie dalacieła da arbity

Sabalenka adkaciłasia na treciaje miesca ŭ suśvietnym rejtynhu

bolš čytanych navin
bolš łajkanych navin

Na kancert Kadyšavaj u Minsku ŭ kakošnikach pryjšli navat mužčyny85

Na kancert Kadyšavaj u Minsku ŭ kakošnikach pryjšli navat mužčyny

Hałoŭnaje
Usie naviny →

Zaŭvaha:

 

 

 

 

Zakryć Paviedamić