Hramadstva44

«Vyhulaju sabaku za 5 jeŭra». Jak ajcišnik vyžyvaje ŭ Ispanii — u Polščy jaho zvolnili za toje, što pierajechaŭ

«Vučusia na kinołaha i niadaŭna straciŭ pracu ŭ IT, tamu šukaju padpracoŭku z sabačkami», — napisaŭ Mikałaj u threads. Akazałasia, što chłopiec — biełarus, a zvolnili jaho za toje, što jon z Polščy pierajechaŭ u Ispaniju. Jahonuju historyju pryvodzić Devby.io.

U 17 hadoŭ Mikałaj pierajechaŭ u Polšču vučycca na astranomiju — chacieŭ stać navukoŭcam. Praŭda, spraŭdzicca hetaj mary było nie nakanavana. Chłopiec kaža, što ŭzrovień studentaŭ va ŭniviersitecie akazaŭsia zanadta nizkim: vykładčykam davodziłasia tłumačyć im bazavuju matematyku, tryhanamietryju i fiziku, kali ŭžo čas byŭ uščylnuju zajmacca astrafizikaj i raźlikami na niabiesnaj śfiery.

«Praz 1,5 hoda ja nie vytrymaŭ ź imi vučycca i ŭsio kinuŭ», — kaža jon.

— Kali z univieram nie skłałasia, ja vyrašyŭ pajści ŭ IT. Pačaŭ adhukacca na vakansii, mnie davoli chutka pieratelefanavali z adnaho startapa. Na nastupny dzień pryznačyli intervju žyŭcom i adrazu zrabili ofier. Ščyra kažučy, ja dasiul nie razumieju, čamu mianie nie toje što ŭziali, a navat zaprasili na surazmoŭje. Reziume ŭ mianie było žachlivaje: zamiest dośviedu (jakoha nie było) — para radkoŭ pra toje, jaki ja kruty. Jašče i ŭ farmacie.pptx (farmat fajłaŭ dla elektronnych prezientacyj — NN). Ciapier razumieju, jaki heta kryndž.

Tak Mikałaj pačaŭ pracavać u padtrymcy klijentaŭ. Paralelna pastupiŭ zavočna na infarmatyku i ekanamietryju. Praŭda, hetuju vučobu potym taksama kinuŭ. Kaža, što nie było hrošaj płacić, dy i ŭ cełym nie bačyŭ sensu ŭ hetym navučańni: šmat teoryi, mała praktyki.

Tak u chłopca zastałasia niaskončanaja vyšejšaja adukacyja ź dźviuch sprobaŭ. Ci pieraškadžaje heta znajści pracu ŭ IT, jon tak i nie zrazumieŭ.

— Ja pravodziŭ ekśpierymient i ŭ reziume ŭkazvaŭ, nibyta skončyŭ univiersitet. Ale bolš vodhukaŭ mnie paśla hetaha prychodzić nie stała.

«Ja nie čakaŭ, što ŭ 2026 hodzie mahu być abmiežavany krainaj»

Apošniaj kampanijaj, u jakoj pracavaŭ Mikałaj, była amierykanskaja EdTech z ofisami ŭ Polščy, Vialikabrytanii dy Indyi. Jon zajmaŭ pazicyju T1 Support [pieršaja linija techničnaj padtrymki — NN] i byŭ pieršym kantaktam dla klijentaŭ, jakija sutykalisia z techničnymi prablemami ŭ praduktach kampanii: adkazvaŭ na zvanki i listy, raźbiraŭsia ŭ prablemie i šukaŭ rašeńni.

— Mnie vielmi padabałasia maja praca. I naohuł heta była pieršaja firma, u jakoj ja adčuvaŭ siabie spakojna: nie pierapracoŭvaŭ, dakładna razumieŭ svaje abaviazki, z kiraŭnictvam taksama ŭsio było dobra.

Zvalnieńnie adbyłosia raptoŭna. Byŭ zvyčajny pracoŭny dzień, ja rucinna vykonvaŭ svaje abaviazki. Jak nazło, sa svajoj prablemaj patelefanavaŭ samy składany klijent, i my hadzinu praz telefon vyśviatlali, što zdaryłasia i što možna zrabić. Na ščaście, prablema była vyrašanaja, klijent zastaŭsia zadavoleny — i ja sa spakojnym sumleńniem pajšoŭ na mit ź mieniedžaram, jaki mnie pryznačyli napiaredadni. Ja navat čakaŭ hetaje sumoŭje 1-na-1.

Jany prachodzili ŭ nas rehularna, ale nie vielmi časta, i mnie hetych siesij nie chapała.

Adnak akazałasia, što pryznačany zvanok byŭ nie stolki ź mieniedžaram, kolki z ejčaram. Mieniedžar paprostu moŭčki siadzieŭ i słuchaŭ, pakul ejčar mnie začytvaŭ, što ja parušyŭ i čamu mianie zvalniajuć adnym dniom.

U kancy mieniedžar tolki dadaŭ, što ŭ mianie byŭ vydatny pierformans dy im škada mianie hublać. Dziakuj, viadoma, ale nie ad usiaho serca.

Jak vyśvietliłasia, Mikałaja zvolnili za toje, što jon z Polščy pierajechaŭ u Ispaniju. Heta nie było ŭkazana ŭ kantrakcie, ale prapisana ŭ polskim pracoŭnym kodeksie pra śpiecyfiku dystancyjnaj pracy. Praz toje, što ŭ roznych krainach roznyja padatki i sacyjałka, firma patencyjna parušała b ispanskija zakony, kali b płaciła padatki za Mikałaja ŭ Polščy.

— Ja absalutna nie čakaŭ, što ŭ 2026 hodzie ja mahu być abmiežavany krainaj. Tym bolš što pra svoj pierajezd ja papiaredžvaŭ mieniedžara zahadzia i nijakich prablem nie było. Pytańni ŭźnikli paźniej u ejčara — i toje vypadkova. Ja sam jamu skazaŭ, što pierajechaŭ, tamu što chacieŭ paprasić daviedku z polskaha ZUSa pra toje, što ŭ mianie jość miedstrachoŭka ŭ ES.

Nasamreč, prablemu lohka možna było vyrašyć, pieravioŭšy mianie na B2B-kantrakt. Ale tady ejčaru pryjšłosia b vykonvać svaju pracu. Dumaju, jon nie zachacieŭ va ŭsim hetym raźbiracca, tamu paprostu skazaŭ, što ničoha nielha zrabić — i mianie zvolnili.

Mikałaj kaža, što adrazu paśla hetaha zvanka adčuŭ dzikuju kryŭdu, nieparazumieńnie i złość na ŭsiu sistemu. Kali čałaviek pracuje dobra, to što jašče treba? Jakaja roźnica, dzie jon znachodzicca?

Supakoiŭšysia, Mikałaj padumaŭ, što, mahčyma, jano i da lepšaha. Zarobak byŭ nie toje kab vialiki, zatoje dośvied u firmie ŭdałosia atrymać vielmi kaštoŭny. «Dumaŭ, abnaŭlu reziume, chutka znajdu bolš vysokaapłatnuju pracu i budu žyć jašče lepiej, čym raniej».

Spojler: nie atrymałasia.

«150 vodhukaŭ, 30—40 aŭtaadmoŭ i nul surazmoŭjaŭ»

Šukać novuju pracu Mikałaj pačaŭ u toj ža dzień. Abnaviŭ profil u LinkedIn, pastaviŭ płanku Open to Work i napisaŭ post pra svajo zvalnieńnie i pošuk novych mahčymaściaŭ. Amal adrazu jamu napisali try rekrutary — praŭda, usie try akazalisia machlarami. Kazali, što ŭ ich jość pasujučyja pazicyi, ale spačatku treba palepšyć reziume ŭ ich płatnaha kansultanta.

Z taho času prajšło ŭžo bolš za miesiac. Za hety čas chłopiec adpraviŭ kala 150 vodhukaŭ, atrymaŭ kala 30—40 aŭtaadmoŭ — i 0 surazmoŭjaŭ.

— Ja nie viedaju, što ja rablu nie tak. Spačatku adhukaŭsia na pazicyi, maksimalna sumiežnyja z majoj — čytaju apisańnie i heta litaralna moj zvyčajny pracoŭny dzień. Ale adkazaŭ nie było. Potym pierarabiŭ reziume, kab sprabavać padavacca ŭ tym liku i na T2 (bolš techničnuju padtrymku). Adkazaŭ pa-raniejšamu nie było. Znoŭ pierarabiŭ reziume i pierapisaŭ daty pracy tak, kab nie było prabiełaŭ, — taja ž historyja. Adaptavaŭ reziume pad ATS — nie dapamahło.

Takoje adčuvańnie, što adzinaje, što ŭpłyvaje, — heta tolki kolkaść vodhukaŭ. Padasi na 500 vakansij — mahčyma, atrymaješ 5 adkazaŭ. I nie važna, ź jakim reziume.

Ja spadziavaŭsia, što na hety raz znajści pracu budzie praściej, bo kali raniej ja byŭ supracoŭnikam startapaŭ biez dakładna paznačanaj pazicyi, to ciapier — śpiecyjalist z dośviedam u dobraj kampanii. Bo mienavita heta treba rekrutaram, tak? Ja ŭ hetym užo nie ŭpeŭnieny.

«Kali pačali prylatać adkazy pa pazicyjach, na jakija ja 100% pasavaŭ, ja pierastaŭ chacieć znajści pracu»

— Ja stamiŭsia dumać, što ja rablu nie tak i jak jašče možna pasprabavać siabie pradać, jak zrabić siabie bolš zaŭvažnym dla hetych čortavych rekrutaraŭ. U niejki momant ja navat pisaŭ im u LinkedIn, ale ŭsio biez tołku

Paśla taho, jak mnie pačali prylatać adkazy pa pazicyjach, na jakija ja 100% pasavaŭ, ja pierastaŭ chacieć znajści pracu. Raniej choć niejkija vodhuki dy skryninhi byli, a ciapier naohuł usio hłucha. Bolš za ŭsio ciśnie nieparazumieńnie, što nie tak z maim profilem i što treba źmianić.

Mnie padabajecca pracavać, ja vielmi adkazny čałaviek i zaŭsiody vykonvaju svaje abaviazki na 110%. Ale pošuk pracy ŭ IT — heta asobnaja niaŭdziačnaja praca, jakoj nie chočacca zajmacca. Kali b mnie prapanavali pracu, ja b pahadziŭsia, nie dumajučy. Ale pakul navat na surazmoŭje nichto nie zaprasiŭ…

«Sił na toje, kab pradavać siabie, u mianie zusim niama»

Paśla zvalnieńnia Mikałaju vypłacili zarobak i kampiensacyju, jakich, pavodle jaho raźlikaŭ, chopić miesiacy na try. Kab žyć dalej, jość jašče źbieražeńni, ale «adsutnaść dachodu bje pa mientałcy, asabliva kali ty ŭ Ispanii ź ichnimi cenami na žyllo».

Ciapier Mikałaj natužliva vučyć ispanskuju, prahladaje lekcyi pa kinałohii i adnačasova šukaje klijentaŭ na vyhuł sabak i pietsitynh.

— Ja zaŭsiody lubiŭ žyviolinaŭ, tamu kali hod tamu mnie trapiłasia rekłama kursa pa kinałohii, ja zacikaviŭsia. Praz pracu nie zaŭsiody ŭdavałasia byvać na zaniatkach, ale, na ščaście, navučańnie prachodzić anłajn i ŭsie ŭroki dastupnyja ŭ zapisie, tamu ciapier ja paprostu nahaniaju stračanaje.

Chaču znajści svaich pieršych pastajannych klijentaŭ na vyhuł/sitynh, skončyć kurs pa kinałohii dy zdać praktyčny ekzamien — dla hetaha mnie treba padrychtavać troch sabak i haspadaroŭ.

Kali b na pracy z žyviołami možna było zarablać dobryja hrošy (3000€+ čystymi), ja b dakładna kinuŭ IT. U realnaści bolš vierahodny scenar 50/50, kali adna pałova dachodu idzie z dystancyjnaj pracy, a druhaja — ad žyviolinaŭ. Kali pafantaziravać, ja b jašče staŭ błohieram i vykładaŭ by skałałazańnie (heta majo chobi), ale bieź finansavaj bazy dajści tudy nierealna.

U pierśpiektyvie, mahčyma, ja moh by jašče stvarać niejkija mini-kursy sa zvarotnaj suviaźziu dla haspadaroŭ, ale da hetaha napieradzie jašče doŭhi šlach z naboram praktyki praz naŭprostavuju pracu z klijentami.

Dumaju, što kali padciahnu movu, chutčej znajdu zvyčajnuju fizičnuju pracu kštałtu barysta ci chacia b pamočnika na kuchni, čym pa śpiecyjalnaści ŭ IT. Reziume ŭsio jašče płanuju rassyłać, ale, kali ščyra, užo navat stała strašnavata ad dumki, što realna zaprosiać na surazmoŭje. Sił na toje, kab pradavać siabie, u mianie zusim niama.

Kamientary4

  • Ale
    18.11.2026
    Ale heta sapraŭdy tak. Kali ty pracuješ nie jak kantraktar (padradčyk, umova o dzieło), a jak supracoŭnik, toje jość peŭnaje padatkovaje, sacyjalnaje rehulavańnie i adkaznaść pracadaŭcy za ciabie. Tamu pieršaja častka niezrazumieła, jak možna mianiać u 1-abakovym padatku damovu z pracadaŭcam, a potym ździŭlacca, što toj ciabie zvalniaje.

    A što da sabačak - kali da hetaha padychodzić surjozna, vychoŭvać ich, dahladać štodnia, moža i biznes vyjdzie. Treba vyznačycca dakładna z temaj i aŭdytoryj.
  • Skarbnik
    18.11.2026
    Nie zdoleŭ zakončyć universitet (2 niaŭdałyja sproby) i spadziajecca na vysoki zarobak?
  • Indrid Cold
    18.11.2026
    “Nasamreč, prablemu lohka možna było vyrašyć, pieravioŭšy mianie na B2B-kantrakt.“
    A voś i nie - u Polščy nklha pieravodzić ludziej z Umovy o Pracy na B2B. [Red. Vydalena]

    [Zredahavana]

Ciapier čytajuć

Pamior 87‑hadovy turecki miljarder, ułaśnik minskaj Crowne Plaza. Ale hrošaj nie pakinuŭ ni žoncy-biełaruscy, ni čatyrom dzieciam40

Pamior 87‑hadovy turecki miljarder, ułaśnik minskaj Crowne Plaza. Ale hrošaj nie pakinuŭ ni žoncy-biełaruscy, ni čatyrom dzieciam

Usie naviny →
Usie naviny

U Biełarusi paskoryŭsia rost VUP5

Juškievič: Adnojčy mnie prapanavali: «Adno słova pa-polsku — 5 sutak ŠIZA. Ryzyknieš?»10

U minskaje mietro maładzion chacieŭ zajści ź niebiaśpiečnym kijem3

Cieła krakaŭskaha strałka nichto zabirać dla pachavańnia nie choča. Jaho dumajuć addać navukoŭcam6

Miss Kraken: sakretnaja ŭkrainskaja sistema vyhladaje jak navukovaja fantastyka, ale ŭžo pracuje na froncie3

Žerar Depardjo pryznaŭ svaju vinu ŭ seksualizavanym hvałcie4

Ci pahražaje Krymu błakada praz paralizavany Krymski most?17

Ukraincy nanieśli mocny ŭdar pa rasijskich radarach i stancyjach REB4

Instytuty sacyjałohii i fiłasofii Akademii navuk abjadnajuć u adzin8

bolš čytanych navin
bolš łajkanych navin

Pamior 87‑hadovy turecki miljarder, ułaśnik minskaj Crowne Plaza. Ale hrošaj nie pakinuŭ ni žoncy-biełaruscy, ni čatyrom dzieciam40

Pamior 87‑hadovy turecki miljarder, ułaśnik minskaj Crowne Plaza. Ale hrošaj nie pakinuŭ ni žoncy-biełaruscy, ni čatyrom dzieciam

Hałoŭnaje
Usie naviny →

Zaŭvaha:

 

 

 

 

Zakryć Paviedamić