Polšča ŭ kastryčniku nadała mižnarodnuju abaronu 22 hramadzianam Biełarusi
Usiaho za kastryčnik upraŭleńnie razhledzieła 95 spraŭ hramadzian Biełarusi, 58 čałaviekam admovili ŭ abaronie.

Jak vynikaje sa spravazdačy Upraŭleńnia pa spravach zamiežnikaŭ, 20 čałaviek byli pryznanyja biežancami, 2 čałavieki atrymali status dadatkovaj abarony, 58 hramadzianam Biełarusi admovili ŭ mižnarodnaj abaronie, piša Reform.news.
U paraŭnańni ź vieraśniem kolkaść stanoŭčych rašeńniaŭ trochi źniziłasia. Tady ich było 24, a kolkaść admoŭ krychu vyrasła, u vieraśni ich było 58. U žniŭni było 36 pazityŭnych rašeńniaŭ, a admoŭ — kala 50. U lipieni mižnarodnaja abarona była nadadzienaja tolki 14 biełarusam, u toj čas jak 82 atrymali admoŭnyja rašeńni. U červieni stanoŭčyja rašeńni atrymali 25 čałaviek, a admovy ŭ mižnarodnaj abaronie — 52 čałavieki.
Ahułam z pačatku hoda Upraŭleńnie pa spravach zamiežnikaŭ vyniesła rašeńni pa 1193 spravach biełaruskich prasicielaŭ prytułku. U studzieni-kastryčniku status biežanca atrymali 322 hramadzianiny Biełarusi, dadatkovuju abaronu — 382 čałavieki, 324 biełarusam było admoŭlena ŭ mižnarodnaj abaronie, a razhlad 165 spraŭ spynili.
Na 1 listapada Upraŭleńnie praciahvała razhladać 3230 spraŭ biełarusaŭ, u tym liku 2890 u pieršaj instancyi, a 340 u druhoj. Za vierasień kolkaść spraŭ u pieršaj instancyi skaraciłasia na 24, a ŭ druhoj — vyrasła na 51. Ahulnaja kolkaść spraŭ biełarusaŭ, jakija razhladajucca Upraŭleńniem, za kastryčnik vyrasła na 18.
Dakumienty, jakija dajuć prava na znachodžańnie ŭ Polščy, na 1 listapada mieli 127,87 tys. hramadzian Biełarusi. Za kastryčnik ich kolkaść źniziłasia na 1964 čałavieki, što moža być źviazana sa skančeńniem terminu dziejańnia dazvołaŭ na žycharstva i praciahłymi pracedurami ich razhladu.
Na 1 listapada biełarusy ŭ Polščy mieli:
72 807 časovych dazvołaŭ na žycharstva,
41 047 pastajannych dazvołaŭ na žycharstva,
9570 statusaŭ dadatkovaj abarony,
2768 statusaŭ doŭhaterminovych rezidentaŭ ES,
1288 statusaŭ biežanca,
209 znachodzilisia na ŭmovach časovaj abarony,
178 mieli inšyja statusy (usiaho 127 867 čałaviek).
Za kastryčnik Upraŭleńnie pa spravach zamiežnikaŭ vydała 1995 pazityŭnych rašeńniaŭ pa časovych dazvołach na žycharstva, 300 — pa pastajannych dazvołach na žycharstva, 100 — pa doŭhaterminovym rezidenctvie ES.
Upraŭleńnie ŭ kastryčniku admoviła ŭ vydačy časovaha dazvołu na žycharstva 214 zajaŭnikam, u pastajannym dazvole na žycharstva — 79, a ŭ statusie doŭhaterminovaha rezidenta ES — 15 hramadzianam Biełarusi.
Z pačatku hoda časovyja dazvoły na žycharstva byli vydadzienyja 19 475 biełarusam, pastajannyja — 3059, a doŭhaterminovaje rezidenctva ES — 910 hramadzianam Biełarusi.
Sioleta ŭpraŭleńnie taksama vydała 6250 polskich prajaznych dakumientaŭ hramadzianam Biełarusi, u tym liku 570 u kastryčniku. Jany mohuć atrymać ich u sproščanym paradku, kali zakančvajecca termin dziejańnia biełaruskaha pašparta, a viarnucca na radzimu dla jaho pieraafarmleńnia pa roznych pryčynach niemahčyma. Upraŭleńnie prahnazuje, što pa vynikach hoda kolkaść vydadzienych prajaznych dakumientaŭ moža pieravysić 7,6 tys.
Kamientary