U Hrodnie na skryžavańni vulic Taŭłaja i Babina Hara płanujuć pabudavać novy žyły kvartał. Jon zamienić ciapierašniuju małapaviarchovuju zabudovu. Prajekt praduhledžvaje ŭźviadzieńnie šmatpaviarchovych damoŭ z kaskadnaj pavierchavaściu i tak zvanych urban-vił. Hrodzienski harvykankam vynies jaho na hramadskaje abmierkavańnie.

Pad zabudovu adviedziena terytoryja płoščaj 4,5 hiektara. U novym kvartale płanujuć raźmiaścić 726 kvater. Pieršyja pavierchi budynkaŭ buduć vykarystoŭvacca pad hramadskija pamiaškańni i abjekty absłuhoŭvańnia.
Prajekt praduhledžvaje try typy zabudovy. Uzdoŭž vulicy Taŭłaja źjaviacca siekcyjnyja damy vyšynioj ad šaści da dziesiaci pavierchaŭ sa źmiennaj pavierchavaściu i kaskadnym siłuetam. Ich pieršyja pavierchi adviaduć pad hramadskija pamiaškańni i abjekty śfiery pasłuh.

Unutry kvartała płanujuć pabudavać šaścipaviarchovyja urban-viły — žyłyja damy z adnym padjezdam. Treci typ zabudovy praduhledžvaje damy sa źmiennaj pavierchavaściu, raźmieščanyja pa pierymietry kvartała. Ich fasady buduć vychodzić jak va ŭnutrany dvor, tak i ŭ bok susiednich žyłych damoŭ.
Dvarovuju terytoryju chočuć zrabić svabodnaj ad tranzitnaha transpartu i parkovak. Zamiest hetaha tam stvorać zialonyja zony adpačynku, dziciačyja i spartyŭnyja placoŭki. Dla azielanieńnia płanujuć vykarystoŭvać drevy, kusty, šmathadovyja raśliny i hazony. Najaŭnyja zialonyja nasadžeńni abiacajuć zachavać.

Prajektam praduhledžana 559 parkovačnych miescaŭ, u tym liku 18 dla ludziej z dadatkovymi patrebami. Usie parkoŭki raźmieściać za miežami žyłoj zabudovy. Prajezd avaryjnych i servisnych słužbaŭ u dvary arhanizujuć pa chodniku z uzmocnienym pakryćciom.
Dla palapšeńnia transpartnaj dastupnaści kvartała rekanstrujujuć skryžavańnie vulic Taŭłaja i Babina Hara. Z boku vulicy Brykiela arhanizujuć kruhavy ruch. Taksama da novaj zabudovy možna budzie padjechać z boku vulicy Taŭłaja.
Zabudoŭščykam vystupaje bresckaja kampanija «Bietonny vulej», a prajekt raspracavała minskaja kampanija «PrajektPrykład».
Hramadskija abmierkavańni prajekta projduć z 23 listapada pa 7 śniežnia 2026 hoda. Prezientacyja adbudziecca 3 śniežnia a 15:00 va ŭpraŭleńni budaŭnictva, architektury i horadabudaŭnictva Hrodzienskaha harvykankama na płoščy Antonija Tyzienhaŭza, 3, u kabiniecie № 1 na pieršym paviersie.
Vyniki hramadskaha abmierkavańnia płanujuć apublikavać na sajcie Hrodzienskaha harvykankama da 21 śniežnia 2026 hoda.
Kamientary