Narešcie skončyli padlik hałasoŭ na vybarach u Alascy. U demakrataŭ budzie jašče adzin sienatar
Alaska stała apošnim amierykanskim štatam, dzie padviali vyniki vybaraŭ u Sienat ZŠA. Pieramohu atrymała pradstaŭnica Demakratyčnaj partyi Mery Piełtała, jakaja nabrała 50% hałasoŭ i apiaredziła dziejnaha sienatara-respublikanca Dena Salivana bolš čym na čatyry pracentnyja punkty.

Takim čynam, pavodle vynikaŭ pramiežkavych vybaraŭ u Kanhres ZŠA, demakraty atrymali ŭ Sienacie 56 miescaŭ, a respublikancy — 44. Pieramoha Piełtały zabiaśpiečyła Demakratyčnaj partyi najbolšuju pieravahu ŭ vierchniaj pałacie Kanhresa z 2009 hoda.
Alaska stała apošnim štatam, dzie vyznačyŭsia pieramožca sienatarskich vybaraŭ. Doŭhi padlik hałasoŭ tłumačycca vialikaj terytoryjaj štata, najaŭnaściu šmatlikich ciažkadastupnych nasielenych punktaŭ, a taksama praciahłym terminam pryjomu biuleteniaŭ, dasłanych poštaj. Ich možna atrymlivać jašče na praciahu 15 dzion paśla dnia vybaraŭ.
53‑hadovaja Mery Piełtoła stała pieršaj pradstaŭnicaj karennych narodaŭ Alaski, abranaj u Sienat. Jaje maci naležała da naroda jupikaŭ, a baćka mieŭ niamieckaje pachodžańnie. Sama Piełtała šmat hadoŭ pracavała ŭ śfiery rybałoŭstva.
U 2022 hodzie jana trapiła ŭ Pałatu pradstaŭnikoŭ Kanhresa, zaniaŭšy miesca pamierłaha kanhresmiena-respublikanca. Adnak praz dva hady prajhrała vybary inšamu kandydatu ad Respublikanskaj partyi.
Demakraty nie pieramahali na vybarach u Sienat ad Alaski z 2008 hoda. Štat tradycyjna padtrymlivaje respublikancaŭ: na prezidenckich vybarach 2024 hoda Donald Tramp atrymaŭ tam pieramohu ź pieravahaj u 13 pracentnych punktaŭ.
Piełtała zdoleła skarystacca niezadavolenaściu žycharoŭ Alaski vysokim koštam žyćcia, asabliva padaražańniem paliva. Rost cen na jaho źviazvajuć z vajnoj suprać Irana, jakuju pačała administracyja Trampa.
Vybarčaja kampanija supravadžałasia niekalkimi skandałami. Najbolšuju ŭvahu pryciahnuła źjaŭleńnie ŭ biuleteniach druhoha kandydata ź imiem Den Salivan. Akramia dziejnaha sienatara-respublikanca, za miesca ŭ Sienacie zmahaŭsia były nastaŭnik ź nievialikaj rybackaj vioski, jaki taksama bałatavaŭsia ad Respublikanskaj partyi.
Druhi kandydat ź imiem Den Salivan, adnak, atrymaŭ tolki 1,7% hałasoŭ i, vierahodna, nie adyhraŭ vyrašalnaj roli ŭ vyniku vybaraŭ. Piełtała zdoleła pieramahčy ŭžo ŭ pieršym tury padliku hałasoŭ, niahledziačy na prysutnaść u biuleteniach jaje asnoŭnaha sapiernika-ciozki.
Adnačasova na Alascy prachodzili vybary ŭ Pałatu pradstaŭnikoŭ Kanhresa, ale ich vyniki pakul nie padviedzienyja. Pavodle papiarednich źviestak, lidziruje respublikaniec Nik Biehič, jakomu Piełtała prajhrała vybary ŭ nižniuju pałatu Kanhresa ŭ 2024 hodzie.
Na Alascy respublikancy mohuć prajhrać sienatarski mandat praz błytaninu z proźviščami. Heta schiema daŭno viadomaja ŭ našym rehijonie
Na Alascy siarod kandydataŭ u sienatary dva Deny Salivany. Hubiernatar zahadaŭ pravieryć, ci datyčnyja da hetaha demakraty
«Usio zaležyć ad mašyn». Tramp usio ž zasumniavaŭsia ŭ sumlennaści vybaraŭ u Kanhres
Vens pačaŭ dystancyjavacca ad Trampa paśla parazy respublikancaŭ na vybarach i prasoŭvaje ŭłasny brend z prycełam na 2028 hod
Kamientary