Суд Валожынскага раёна прысудзіў жыхара вёскі Бабровічы да штрафа ў памеры 920 рублёў за тое, што ён утапіў у калодзежы сабаку свайго сваяка.
Дзяржаўнае абвінавачанне ў судзе падтрымліваў памочнік пракурора Валожынскага раёна Надзея Радзевіч. Яна распавяла выданню kraj.by:
«61-гадовы жыхар вёскі Бабровічы, вартаўнік сельскагаспадарчага прадпрыемства, 26 чэрвеня прыйшоў у вёску Капусціна ў госці да брата сваёй жонкі. Выпівалі. Госць паспаў, але не працверазеў. Каля 19.00 ён выйшаў на веранду і ўбачыў, як сабака гаспадара гуляе ў двары з куранём. П'яны мужчына вырашыў, што беспародная Матрошка хоча задушыць кураня, таму ён выйшаў на двор, злавіў сабаку, аднёс яго ў агульны вясковы калодзеж і кінуў у ваду».
Матрошка патанула. Па словах Надзеі Радзевіч, інцыдэнт бачыў гаспадар, яго сужыцелька і суседка, але ніхто не спыніў госця з Бабровічаў.
Сам абвінавачаны казаў у судзе, што ў прынцыпе не любіць жывёл. У якасці прыклада прывёў выпадак, калі ў іх на сельгаспрадпрыемстве сабакі пакусалі цяля, і яго давялося дабіць, каб не мучаўся.
Мужчына распавёў таксама, што спачатку хацеў адвесці Матрошку на трасу, каб яе збіла машына. Але потым перадумаў і аднёс у калодзеж.
«Калодзеж з пітной вадой стаіць не ў двары прыватнага дома, а на вуліцы Цэнтральнай, — адзначае Надзея Радзевіч, — і ім карыстаюцца жыхары некалькіх дамоў, таму абвінавачаны яшчэ і чыстую пітную ваду сапсаваў. Але галоўнае, вядома, што ён пазбавіў жыцця ні ў чым не павінную жывёлу. У судзе я прасіла аштрафаваць мужчыну на 1 380 рублёў — 60 базавых велічынь, але суд палічыў дастатковым пакараннем штраф у 40 базавых, 920 рублёў. Акрамя гэтага, мужчыну прымусова па месцы жыхарства будуць лячыць ад алкагалізму».
Памочнік пракурора Валожынскага раёна распавяла таксама, што абвінавачаны раней судзімы не быў, жыве з жонкай, у яго дарослыя паўналетнія дзеці.
Справа была распачатая і расследавалася паводле першай часткі артыкула 339/1 КК РБ «Жорсткае абыходжанне з жывёлай, якое пацягнула яго гібель, здзейсненае з хуліганскіх памкненняў».
Злачынства караецца грамадскімі работамі або штрафам, або папраўчымі работамі на тэрмін да аднаго года, ці арыштам да трох месяцаў.
Прысуд пакуль не ўступіў у законную сілу, і абвінавачаны можа яго абскардзіць у Мінскі абласны суд ва ўстаноўленым парадку.
Цяпер чытаюць
Ад прыватнікаў патрабуюць завесці ідэолага ў штаце — распыталі, што робяць кампаніі17
Каментары