Сустаршыня аргкамітэта па стварэнні партыі «Беларуская хрысціянская дэмакратыя» (БХД) Павел Севярынец 9 ліпеня наведаў Гомель. Ён сустрэўся з дэмакратычным актывам і рэгіянальнымі каардынатарамі аргкамітэта па стварэнні БХД.
Як паведаміў БелаПАН П.Севярынец, асноўная мэта яго паездкі - знаёмства з дэмакратычнымі актывістамі рэгіёна.
Галоўнай задачай аргкамітэта па стварэнні БХД П.Севярынец лічыць згуртаванне беларускіх вернікаў розных канфесій. «Наша сіла - у веры, у любові да Бога і сваёй Радзімы. Падману, дыктатуры і нянавісці мы можам супрацьстаяць толькі верай. Мы верым у перамогу і лічым, што, аб'яднаўшы вернікаў, за некалькі гадоў зможам узняць краіну. Апазіцыя, якая змагаецца за ўвесь народ, выйграць не можа ў барацьбе супраць рэжыму. Але калі з рэжымам змагаецца сам народ - рэжым асуджаны», - заявіў П.Севярынец.
Маладым актывістам палітык паведаміў аб сваім знаходжанні на пасяленні ў вёсцы Малое Сітна ў Віцебскай вобласці і аб працы, праведзенай сярод мясцовага насельніцтва за два гады абмежавання волі. Палітык прадставіў удзельнікам сваю новую кнігу «Брату».
«Сёння адна з задач - падхапіць той супраціў, што ідзе з глыбіні народа. Патрэбна такая партыя, якая падтрымае гэты пратэст і арганізуе людзей. Думаю, у БХД ёсць усе шанцы стаць такім звяном, якое арганізуе, - і паміж людзьмі, і паміж рознымі партыямі», - лічыць П.Севярынец.
На гэтым тыдні палітык плануе наведаць раённыя цэнтры Гомельскай вобласці Мазыр, Светлагорск, Жлобін і Рэчыцу.
Цяпер чытаюць
Свецкае жыццё Дар’і Шманай: дні нараджэння дзяцей Кіркорава і Comedy Club4
Каментары