«Ці ёсць сэнс за іх чапляцца?» Пуцін намякнуў пра гатоўнасць спыніць вайну, калі яму здадуць Данбас
Прэзідэнт Расіі Уладзімір Пуцін падчас свайго выступу на дыскусійным клубе «Валдай» у Істры пад Масквой заявіў, што хацеў бы як мага хутчэй спыніць вайну з Расіяй шляхам мірных перамоў, калі Расія атрымае кантроль над усёй Данецкай вобласцю.
«Нам бы хацелася ўсё гэта як мага хутчэй спыніць, з дапамогай, прычым, мірных перамоў. Трэба толькі перастаць абвінавачваць Расію ў тым, што мы не хочам гэтых перамоў, а, зыходзячы з рэалій, якія складваюцца на зямлі, прымаць адказныя рашэнні — як самой Украіне, так і яе спонсарам на Захадзе. Перш за ўсё, вядома, сёння ў Еўропе», — сказаў Пуцін.
Ён заявіў, што, паводле ягоных звестак, Расія толькі за верасень узяла пад кантроль 1301 квадратны кіламетр тэрыторыі. Пуцін сцвярджае, што гэта ў 2,5 раза больш, чым у папярэднія месяцы, і што тэмпы наступу расійскіх войскаў павялічваюцца.
Па словах Пуціна, Украіна цяпер кантралюе толькі каля 11% тэрыторыі Данецкай вобласці.
Аднак гэтыя лічбы не супадаюць з ацэнкамі іншых крыніц. Паводле ўкраінскага OSINT-праекта DeepState, за ўвесь верасень Расія захапіла каля 45 квадратных кіламетраў тэрыторыі па ўсёй лініі фронту. «Радыё Свабода» ў канцы жніўня паведамляла, што пад кантролем Украіны заставалася каля 18% тэрыторыі Данецкай вобласці.
Пуцін таксама заявіў, што на ўкраінскім вышэйшым узроўні нібыта лічаць магчымым утрымліваць астатнія 11% тэрыторыі Данецкай вобласці яшчэ паўтара года, а ў Еўропе, паводле яго слоў, гавораць пра два гады. Ён сцвярджае, што страта гэтых тэрыторый адбудзецца значна раней з улікам, як ён сказаў, усё большых тэмпаў прасоўвання расійскіх войскаў.
У сувязі з гэтым Пуцін паставіў пытанне, ці ёсць сэнс Украіне працягваць утрымліваць гэтыя тэрыторыі, калі, паводле яго ацэнкі, іх страта непазбежная.
«Калі страта гэтых тэрыторый непазбежна адбудзецца, ці ёсць сэнс за іх чапляцца, ахвяруючы людзьмі, іх бяспекай і жыццямі?» — запытаўся Пуцін.
Паводле падлікаў амерыканскага Інстытута вывучэння вайны (ISW), з лютага 2022 года Пуцін як мінімум 15 разоў называў тэрміны захопу Расіяй Данецкай вобласці, самы ранні — 9 мая 2022 года. Цяпер, адзначаюць у ISW, РФ мае намер захапіць Данбас да канца 2026 года, але пры захаванні цяперашніх тэмпаў прасоўвання зможа зрабіць гэта не раней за 2032 год.
Падчас выбуху на абаронным хімзаводзе ў Падмаскоўі загінулі як мінімум сем чалавек
Марк Рутэ: У Расіі няма шанцаў нас перамагчы
Прэм'ер-міністр Балгарыі заклікаў Еўропу пайсці на саступкі Пуціну
Для Пуціна на Урале пабудавалі «бункер Суднага дня» на выпадак ядзернай вайны
Пуцін чацвёрты раз з пачатку года павялічыў штатную колькасць расійскага войска
Цяпер чытаюць
Студэнтак беларускіх ВНУ абавязалі тэрмінова запоўніць анкету з пазначэннем свайго росту74
Каментары