Хоць апазіцыя не заклікала на Плошчу, людзі зладзілі шэсце па праспекце ФОТА, ВІДЭА
Некалькі соцень мінчукоў пайшлі шэсцем ад Кастрычніцкай плошчы да плошчы Незалежнасці.
У журналістаў «Нашай Нівы» засталося ўражанне, што ў першых шэрагах маніфестантаў ішла таксама група правакатараў. Яны былі нападпітку, выкрыквалі агрэсіўныя лозунгі, а потым нечакана зніклі, нібы растварыліся, калі ўвагу журналістаў адцягнуў дзіўны хлопец з расійскім трыкалорам.
22:37
Каля Касцёла засталося каля 40 чалавек, разам з журналістамі. Усе разыходзяцца.
22:31
Урэшце хлопчыка адпусцілі, ён пратакол не падпісаў. Маршрутка з'язджае.
22:20
Хлопца вядуць у маршрутку, што стаіць каля касцёла «Сухарава — Чыжоўка». Бачна, што яго там афармляюць.
22:12
Людзі з расцяжкамі некуды зніклі
22:10
Двое міліцыянераў падышлі да хлопца са сцягам, кажуць, што супраць яго будзе складзены пратакол за незаконнае шэсце. Пытаюць, ці ёсць у яго дакументы. У яго няма дакументаў.
Складаюць пратакол. У міліцыянтаў (капітан Рамека і старшы лейтэнант Смірноў) — камеры го-про на форме.
На плошчы — каля 100 чалавек.
Хлопцу — 17 гадоў. Яго завуць Ягор Скрабнеўскі. «За што яго затрымліваюць, чаму менавіта ён?»
«Ён кепскія словы гаварыў і са сцягам», — адказваюць міліцыянеры.
21:42
З'явіўся нейкі чалавек, загорнуты з расійскі сцяг. Яго адагналі да гатэля «Мінск». Пакуль у натоўпе некалькі правакатараў.
Людзі пакуль бязмэтава ходзяць па плошчы Незалежнасці. Частка разышлася, большасць застаецца на плошчы.
21:40
Людзі перыядычна гукаюць: «Дзе Статкевіч?»
21:36
Малітва скончылася. Гукаюць «Жыве Беларусь».
Нейкі чалавек з расійскім сцягам выйшаў на Плошчу:
Людзі ў штацкім спрабавалі яго затрымаць, але ён збег.
21:34
Людзі пачынаюць маліцца. Прапануюць памаліцца і разысціся.
Спяваюць «Магутны Божа».
21:26
Дайшлі да плошчы Незалежнасці, да Чырвонага касцёла. Міліцыя нічога не прадпрымае. Людзі разбрыдаюцца па плошчы.
21:14
Запалілі фаеры. Перад калонай ідзе групка людзей у цывільным з рацыямі, чалавек восем.
Дайшлі да «Цэнтральнай кнігарні».
21:11
Спускаюцца ў пераход каля ГУМа. Скандуюць: «Лукашэнка, сыходзь!».
Ідуць каля ГУМа. Міліцыя папярэджвае пра недапушчэнне правядзення такіх акцый.
21:06
Людзі рушылі праспектам у бок ГУМа.
20:52
На Кастрычніцкай плошчы прысутнічае каля 200 чалавек.
20:02
Сярод дэманстрантаў — грамадскі актывіст Максім Вінярскі і кінарэжысёр Вольга Мікалайчык, экс-палітвязень Юрый Рубцоў. Прыйшлі таксама пісьменнік Адам Глобус, палітолаг Уладзімір Мацкевіч, граф Аляксандр Прушынскі, экс-палітвязень Зміцер Дашкевіч, Вячаслаў Сіўчык, прадпрымальнік Алесь Макаеў.
«Мы не можам маўчаць», — патлумачыў у інтэрв'ю Радыё Свабода Максім Вінярскі.
Яны трымаюць бел-чырвона-белыя сцягі і расцяжку «Лукашэнка, сыходзь».
Зазначым, што на Плошчу не заклікалі ні лідары апазіцыі, ні кандыдатка ў прэзідэнты Таццяна Караткевіч.
Лукашэнка сёння размаўляючы з журналістамі, заклікаў апазіцыю «жыць па законе». «Нават калі яны ўчора ў парушэнне нашых законаў выйшлі — там не было ніводнага міліцыянта. Я жорстка запатрабаваў — не чапайце нікога да выбараў. Выбары заканчваюцца сёння ў 20 гадзін. Я папярэджваю — пачынайце жыць па законе!», — cказаў ён.
Ён таксама адзначыў, што ведае ўсіх апазіцыянераў, «іх 400 чалавек з 10 мільёнаў». «Яшчэ раз папярэджваю — выбары заканчваюцца ў 20 гадзін. Выконвайце закон», — прыгразіў ён.
Цяпер чытаюць
Блогер Сярога з Расіі прыехаў на Зыбіцкую з каханай блогеркай Анечкай. Вынік: збіты ім беларус у коме, а Сярога на 5,5 года за кратамі10
Каментары