Нацыянальнае агенцтва па турызме выдала брашуру «100 рэчаў, якія трэба зрабіць у Беларусі». Пра гэта паведаміла сёння журналістам начальнік аддзела Нацагентства па турызме Ірына Гардзіенка, перадае БелТА.
Выданне пазіцыянуецца як унікальны гід па самых яркіх уражаннях для падарожжа па Беларусі. «Гэтыя 100 сакрэтаў з душой абралі мясцовыя жыхары, каб бліжэй пазнаёміць са сваёй краінай, дзе кожны знойдзе сабе занятак», — распавялі выдаўцы.
Турыстам прапануюць пабываць у самых розных кутках краіны — ад тусовачнай вуліцы Зыбіцкай у Мінску да музея старадаўніх рэчаў на гарышчы звычайнага дома ў Іўі. Брашура распавядае аб чароўных месцах, дзе прынята загадваць жаданні, і назіральных пляцоўках, адкуль можна зняць найлепшыя віды краіны — і гэта не толькі Мінск. Не забыліся складальнікі і пра IT-брэнды краіны: прапануецца зрабіць фота з танкам на радзіме легендарнай гульні «World of Tanks» і серыю сэлфі з выдатнымі мясцінамі Беларусі ў дадатку MSQRD. Пакатацца на БелАЗе, прайсціся ў балотаступах, разгадаць загадку забойства Кенедзі, убачыць сімвалы савецкай эпохі — толькі некаторыя пункты з спісу.
Беларусь дае магчымасць быць бліжэй да прыроды: тут раяць збіраць грыбы і ягады, слухаць спевы птушак у лесе, здзяйсняць велапрагулкі і сафары, сплесці вянок з васількоў і сустрэць світанак на беразе возера. У спісе ёсць і нестандартныя варыянты сну — пераначаваць на сенавале, на пчаліных вуллях у аграсядзібе або ў каюце плывучай гасцініцы.
Аматарам гастранамічнага турызму прапануецца не толькі пакаштаваць стравы нацыянальнай кухні, але і самім паўдзельнічаць у зборы ўраджаю і навучыцца здабываць бярозавы сок. У спісе для дэгустацыі — журавіны ў цукры, пламбір, жытні хлеб, чай з палявых і лясных траў, самагонка з закускай з агурка і мёду.
Для зручнасці топ-100 разбілі на чатыры блокі заняткаў, якія будуць цікавыя вясной, летам, восенню і зімой. Выданне будзе даступна на 8 мовах: рускай, польскай, нямецкай, англійскай, французскай, кітайскай, арабскай і іўрыце.
У Нацагентстве па турызме абяцаюць, што пакет прома-прадукцыі аб Беларусі папоўніцца яшчэ некалькімі цікавымі выданнямі. У прыватнасці, у Беларусь збіраецца англійскі падарожнік Найджэл Робертс. Ён плануе выпусціць новы даведнік па Беларусі. Першая рэдакцыя яго даведніка па Беларусі выйшла ў 2008 годзе і карысталася вялікай папулярнасцю сярод англамоўных турыстаў.
Цяпер чытаюць
Галоўным спікерам Жаночага форуму ў Мінску стане расійскі крынджовы псіхолаг, які расказваў пра «памяць жаночых палавых губ»4
Каментары