Вайсковая разведка Украіны назвала тры напрамкі, на якіх расійская армія можа пайсці ў наступленне
Беларусі сярод іх няма.
«Мы вызначылі, што наступы войскаў Расіі могуць быць у Данецкай і Луганскай абласцях, а таксама, магчыма, у Запарожжы. Пры гэтым у «Херсонскай вобласці і ў Крыме расіяне будуць весці абарону», — заявіў спікер Галоўнага ўпраўлення разведкі Мінабароны Украіны Вадзім Скібіцкі.
Паводле яго даных, расійскаму войску спатрэбяцца яшчэ два месяцы, каб укамплектаваць новыя вайсковыя фармаванні. У ГУР лічаць, што Мінабароны Расіі плануе мабілізаваць яшчэ ад 300 да 500 тысяч расіян для наступальных аперацый на ўсходзе і поўдні Украіны вясной і летам 2023 года.
Раней газета Financial Times паведаміла, што Расія цягам наступных 10 дзён можа пачаць буйнамаштабны наступ ва Украіне — у раёне Крамянной і Лімана ў заходняй частцы Луганскай вобласці. Кіраўнік ваеннай адміністрацыі Луганскай вобласці Сяргей Гайдай пацвердзіў, што расійская армія сцягвае войскі ў гэты раён і можа пачаць наступ пасля 15 лютага.
Каментары