Цыганы ў Расіі патрабуюць забараніць тэрмін «інфацыганы» і блакаваць рэсурсы, якія ім карыстаюцца
Кіраўнік Федэральнага агенцтва па справах нацыянальнасцяў Ігар Паноў заклікаў СМІ разабрацца з тэрмінам «інфацыганы» — на яго выкарыстанне паскардзіліся Уладзіміру Пуціну падчас пасяджэння Рады па міжнацыянальных адносінах, піша РБК.
«Нават не жадаючы таго, можна пакрыўдзіць цэлы этнас. Мы накіравалі ў нашы вялікія сродкі масавай інфармацыі зварот для таго, каб больш уважліва да гэтага ставіцца, каб не ўжываць падобных тэрмінаў, якія закранаюць тую ці іншую нацыянальнасць», — заявіў ён.
На пасяджэнні рады на мінулым тыдні спецыяліст у галіне гісторыі цыганоў Надзея Дэметэр звярнула ўвагу, што блогеры ўжываюць тэрмін «інфацыганы» ў дачыненні да нядобрасумленных арганізатараў курсаў у інтэрнэце.
«Мы лічым такое стаўленне да прадстаўнікоў той ці іншай нацыянальнасці недапушчальным ні з пункту гледжання маралі, ні з пункту гледжання закона», — адзначыла Дэметэр і папрасіла заканадаўча забараніць гэтае словазлучэнне.
«Неабходна забараніць выкарыстанне тэрміна «інфацыганы» ў сетцы інтэрнэт і блакаваць рэсурсы», — падкрэсліла яна.
Каментары