Грамадзянскі самалёт з Познані праляцеў 20 кіламетраў углыб закрытай украінскай паветранай прасторы.
Учора ў 17:35 польскі грамадзянскі самалёт кампаніі Enter Air заляцеў у паветраную прастору Украіны. Як піша выданне The Poznan, самалёт туды заляцеў выпадкова.
Паветранае судна выконвала рэйс з Познані ў Анталію (Турцыя) і з-за праблем з надвор'ем заляцела ўглыб Украіны на 20 кіламетраў і потым вярнулася назад.
Усяго польскі самалёт прабыў над украінскай тэрыторыяй пяць хвілін.
«Самалёт быў вымушаны змяніць маршрут, каб пазбегнуць трапляння ў навальнічны фронт. Аптымальную дарогу яму паказвалі каардынатары палётаў са Славакіі. У выніку паветранае судна выпадкова заляцела ва Украіну і на пяць хвілін апынулася над Ужгарадам», — распавёў авіяперавозчык Enter Air, чый самалёт і заляцеў ва Украіну.
Нагадаем, што з пачатку вайны ва Украіне яе паветраная прастора застаецца закрытай для руху грамадзянскага авіятранспарту. Амаль такая ж сітуацыя і ў Беларусі, над якой забаронена лятаць большасці авіякампаній праз паветранае пірацтва рэжыму Лукашэнкі.
Пры гэтым нядаўна адзін з еўрапейскіх самалётаў гэтую забарону парушыў.
Цяпер чытаюць
Беларускую мову на ЦТ выбірае ўсё меншая доля выпускнікоў школ. Калі 20 гадоў таму яе здавала амаль палова, цяпер — толькі кожны шосты2
Каментары