У Беларусі з'явяцца «дружалюбныя пакоі», каб дапытваць дзяцей да 16 гадоў
Савет Міністраў распарадзіўся стварыць па ўсёй краіне «дружалюбныя пакоі» для допыту дзяцей да 16 гадоў, вынікае з пастановы №539 ад 17 жніўня 2023 года.
«Аблвыканкамам і Мінскаму гарвыканкаму забяспечыць да 1 студзеня 2025 года стварэнне ў кожным раёне, горадзе абласнога падпарадкавання не менш за адзін дружалюбны да дзяцей пакой для допыту, у горадзе Мінску — не менш за два такія пакоі», — гаворыцца ў пастанове.
Гэтым жа дакументам зацверджана палажэнне «Аб дружалюбным да дзяцей пакоі для допыту».
Пад гэтым пакоем маецца на ўвазе, як сказана ў дакуменце, «спецыяльна абсталяванае памяшканне, у якім органам, які вядзе крымінальны працэс, робіцца допыт непаўналетніх пацярпелага або сведкі, якія не дасягнулі шаснаццацігадовага ўзросту, па крымінальных справах аб злачынствах супраць асабістай свабоды, гонару і годнасці, жыцця і здароўя, палавой недатыкальнасці або палавой свабоды».
«Дружалюбны да дзяцей пакой можа выкарыстоўвацца для атрымання органам крымінальнага пераследу тлумачэнняў непаўналетніх…, а таксама для працы педагогаў і псіхолагаў з непаўналетнімі ў мэтах аказання ім сацыяльна-педагагічнай падтрымкі і псіхалагічнай дапамогі», — абвяшчае палажэнне.
Згодна з дакументам, дружалюбны да дзяцей пакой «ствараецца на базе сацыяльна-педагагічнага цэнтра». Памяшканні органаў Дзяржаўнага камітэта судовых экспертыз і Следчага камітэта таксама могуць выкарыстоўвацца як такія пры выкананні ўстаноўленых патрабаванняў.
Патрабаванні да «дружалюбных да дзяцей пакояў» вызначаюцца наступныя:
- наяўнасць асобных уваходаў і выхадаў у памяшканне, месцаў для размяшчэння верхняга адзення, а таксама сумежнага ізаляванага і абсталяванага гука— ды відэазапісной апаратурай, сродкамі радыёкамунікацыі памяшкання, прызначанага для дыстанцыйнага назірання;
- гуканепранікальнасць памяшкання;
- афарбоўка сцен памяшкання ў пастэльныя таны, адсутнасць у ім карцін і іншых элементаў дэкору;
- наяўнасць наступнага матэрыяльна-тэхнічнага абсталявання: канапа, крэсла, стол, крэсла-мяшок, канапавая падушка, цацкі;
- сістэма гука– і відэафіксацыі;
- не менш за дзве відэакамеры;
- адзін камп'ютар (два маніторы).
Каардынацыя і кантроль за функцыянаваннем такіх пакояў на базе сацыяльна-педагагічных цэнтраў ускладзеныя на Міністэрства адукацыі.
«Ад нечаканасці я ўдарыла яе па руках». Маладыя маці пра заўвагі, якія іх раздражняюць
«З вокнаў вылівалі кіпень, кідаліся прадуктамі». У Маладзечне ідзе «вайна» паміж падлеткамі і пенсіянерамі
«Мы пацярпелі ад пераездаў не менш, чым дарослыя». Беларускія падлеткі, якія эмігравалі з бацькамі, робяць падкаст пра такіх, як самі
Каментары