Зялёныя: ЦВК, не рэгіструй Някляева, бо ён забіў кацяня

Беларуская партыя «Зялёныя» заклікае Цэнтрвыбаркам не рэгістраваць у якасці кандыдата ў прэзідэнты Беларусі Уладзіміра Някляева. Аб гэтым гаворыцца ў заяве партыі, распаўсюджанай 24 верасня.

Падставай для заявы стала анлайн-канферэнцыя на сайце інтэрнэт-выдання «Салідарнасць» 22 верасня, дзе Някляеў прызнаўся, што ў дзяцінстве забіў кацяня.

Працэс забойства быў падрабязна апісаны Някляевым у творы «Армагедон. Драматычная паэма». Адказваючы на пытанне, ці рэальны гэта факт з яго біяграфіі, Някляеў сказаў: «Рэальны. Шмат чаго ў дзяцінстве — ва ўспамінах аб ім і ў яго фіксацыях — таямніца. Напрыклад, прыступы дзіцячай жорсткасці… У мяне такое здарылася толькі раз, але ўсё ж здарылася. Як, чаму?.. Звычайнымі спосабамі сам сабе я не мог гэта растлумачыць, таму і паспрабаваў прааналізаваць у драматычнай паэме».

«Публічнае бравіраванне палітыка сваім жорсткім стаўленнем да жывёл ставіць пад сумнеў яго маральнае аблічча і прымушае задумацца аб небяспецы, якую можа ўяўляць яго кампанія для грамадства», — гаворыцца ў заяве Беларускай партыі «Зялёныя».

«Паколькі адным з асноўных праграмных прынцыпаў Беларускай партыі «Зялёныя» з’яўляецца ахова навакольнага асяроддзя і жывёльнага свету, мы выступаем з пратэстам супраць прапаганды жорсткага абыходжання з жывёламі ў беларускай палітыцы, — падкрэсліваюць зялёныя. — Мы хочам нагадаць Уладзіміру Някляеву, што забойства жывой істоты не з’яўляецца толькі пытаннем рэалізацыі яго хваравітага лібіда і літаратурных амбіцый».

У заяве таксама адзначаецца, што «неабходнасць абароны жывёл ад жорсткага абыходжання даўно прызнана на міжнародным узроўні». «За дзеянні, якімі бравіруе пісьменнік, прэтэндуючы на прэзідэнцкую пасаду, у большасці еўрапейскіх краін прадугледжана крымінальная адказнасць. Нават у Беларусі, дзе, на думку большасці экспертаў, правы жывёл абаронены ў недастатковай ступені, таксама прадугледжана пакаранне для такіх, як Някляеў», — гаворыцца ў заяве.

Беларуская партыя «Зялёныя» патрабуе «спыніць прапаганду жорсткага абыходжання з жывёламі ў ходзе выбараў». «Публічная выбарчая кампанія чалавека з такімі поглядамі, як у спадара Някляева, будзе спрыяць дэгуманізацыі беларускага грамадства. У першую чаргу, гэта можа нанесці велізарную шкоду маральнаму здароўю моладзі і дзяцей. Акрамя таго, з’яўленне палітычнага лідара з рэнамэ «забойца кацяняці» стане дыскрэдытацыяй усяго беларускага грамадства ў вачах еўрапейскай грамадскасці, паказчыкам яго нізкай цывілізаванасці», — лічаць аўтары заявы.

Варта адзначыць, што першы намеснік старшыні Беларускай партыі «Зялёныя» Юрый Глушакоў таксама балатуецца на пасаду прэзідэнта.

• 0
• 0
• 0
• 0
• 0
• 0
• 0
• 0