Турэцкі, казахскі і іншыя патэнцыяльныя інвестары выказваюць цікавасць да куплі дзяржаўнай долі акцый СТАА «Мабільныя ТэлеСістэмы» («МТС»). Пра гэта паведаміў першы намеснік старшыні Дзяржкамітэта па маёмасці Сяргей Пяткоў 2 лістапада ў Мінску на прэзентацыі кампаніі. У ёй узялі ўдзел прадстаўнікі кампаній «Турксел» (Турцыя) і «Ксеракс» (ЗША).
«Пакуль у нас ідзе ўсё на стадыі перамоў», — удакладніў Пяткоў.
Ён нагадаў, што заяўленая ацэнка дзярждолі акцый складае 1 млрд. долараў, яна праводзілася дзяржаўным Інстытутам нерухомасці і ацэнкі па стане на 1 чэрвеня 2010 года. «Новай пераацэнкі не плануецца», — падкрэсліў прадстаўнік Дзяржкаммаёмасці.
Паводле слоў Пяткова, працягваюцца таксама перамовы з расійскім ААТ «МТС», уладальнікам 49% акцый СТАА «МТС». «Але пакуль іх не задавальняе цана», — дадаў ён.
Дата правядзення новага конкурсу па продажы дзярждолі «МТС» будзе вызначана пасля правядзення ў Мінску 15–16 лістапада Беларускага інвестыцыйнага форуму. На ім таксама плануецца правесці прэзентацыю прапановы аб продажы дзярждолі МТС. Пяткоў не выключыў магчымасці з’яўлення новых патэнцыяльных інвестараў, якія змогуць узяць удзел у конкурсе.
0
0
0
0
0
0
