Masad papiaredziŭ ZŠA ab płanach Irana zabić Trampa dronami

Pavodle vydańnia, amierykanskija śpiecsłužby sami paprasili Masad pravieryć infarmacyju pra pahrozy. Izrailskaja raźviedka paćvierdziła jaje, jak i jašče adna zachodniaja śpiecsłužba, jakuju hazieta nie nazyvaje.

Adzin z surazmoŭcaŭ raskazaŭ, što Vašynhton i raniej viedaŭ pra iranskija pahrozy na adras kiraŭnictva ZŠA — asabliva paśla zabojstva viarchoŭnaha lidara Irana Ali Chamieniei na pačatku sumiesnaj amierykana-izrailskaj apieracyi. Adnak novyja źviestki ŭkazvajuć na kankretnyja i niadaŭnija płany, u tym liku vykarystańnie dronaŭ z vybuchoŭkaj. Suprać takich atak zvyčajnych mier asabistaj achovy moža być niedastatkova.

Pavodle Fox News, ministra finansaŭ Skota Biesienta ŭžo pierasialili ź jaho doma ŭ vašynhtonskim rajonie Džordžtaŭn na abaronienuju vajskovuju bazu. Mienavita jon kuryruje sankcyi suprać Irana i ličycca adnym z hałoŭnych arhanizataraŭ ekanamičnaha cisku na Tehieran.

Dziaržsakratar Marka Rubia taksama atrymaŭ abaronienaje žyllo na vajskovaj bazie. Ministr abarony Pit Chiehsiet znachodzicca na achoŭnym vajskovym abjekcie.

Čynoŭniki, jakim pahražaje niebiaśpieka, rezka abmiežavali ŭdzieł u mierapryjemstvach pad adkrytym niebam. Takich vystupaŭ stała mienš i ŭ Trampa. Kali jany ŭsio ž adbyvajucca, razam z uzmocnienaj achovaj vykarystoŭvajuć śpiecyjalnyja sistemy suprać dronaŭ.

Vydańnie taksama paviedamlaje pra vizit kiraŭnika Masada Ramana Hofmana ŭ ZŠA, dzie jon sustreŭsia, siarod inšych, z dyrektaram CRU Džonam Retklifam. Pavodle haziety, paśla pryznačeńnia Hofman časta naviedvaje ZŠA i padtrymlivaje ciesnuju kaardynacyju z amierykanskimi kalehami.

Krynicy Israel Hayom śćviardžajuć, što źviestki pra pahrozy stali adnoj z hałoŭnych pryčyn źmieny pazicyi Trampa adnosna pieramoŭ ź Iranam.

Tehieran, pavodle surazmoŭcaŭ haziety, prademanstravaŭ peŭnuju hnutkaść u jadziernym pytańni. Ale jon admaŭlajecca ad pradmietnych pieramoŭ da źniaćcia marskoj błakady, istotnaj častki sankcyj i razmarožvańnia iranskich aktyvaŭ.

Tramp tym časam adchiliŭ ad pieramoŭ vice-prezidenta Džej Dzi Vensa, jaki vystupaŭ za pahadnieńnie. U zajavie, apublikavanaj u čaćvier, prezident paviedamiŭ, što paprasiŭ jaho zasiarodzić «poŭnuju i absalutnuju ŭvahu» na karupcyi i złačynnaści ŭ amierykanskich haradach i štatach pad kiravańniem demakrataŭ.

«Nam nie patrebnaje pahadnieńnie ź Iranam. Hetyja časy daŭno minuli. U nas ich hrošy, sotni miljardaŭ dalaraŭ, i ŭ nas ich praliŭ!» — napisaŭ Tramp, majučy na ŭvazie Armuzski praliŭ.

Jon taksama zajaviŭ, što baraćba Vensa z karupcyjaj zekanomić krainie bolš hrošaj, čym damoŭlenaść z Tehieranam. Heta adbyłosia na nastupny dzień paśla paviedamleńniaŭ, što vice-prezident sprabavaŭ arhanizavać niepasrednuju sustreču z vysokapastaŭlenymi iranskimi čynoŭnikami dziela spynieńnia vajny.

Što Tramp vyrašyć rabić dalej, pakul niezrazumieła. Pavodle Israel Hayom, ZŠA rychtujucca ŭzmacnić ekanamičny cisk, pierakryvajučy iranskija handlovyja maršruty praz suchaputnyja miežy, najpierš ź Irakam i Turcyjaj. Mahčymaść novych vajskovych udaraŭ taksama zastajecca: hazieta źviazvaje jaje ź iranskaj jadziernaj prahramaj i adnaŭleńniem vytvorčaści rakiet, abjekty jakoj Tehieran pieranosić hłyboka pad ziamlu.

• 0
• 0
• 0
• 0
• 0
• 0
• 0
• 0