Karupcyjny skandał u Vienhryi: ministr Orbana zakapaŭ u lesie 17 miljonaŭ jeŭra
Padčas rasśledavańnia karupcyi ŭ dačynieńni da byłoha ministra śledčyja vyjavili najaŭnyja hrošy na sumu kala 17,6 miljona jeŭra. Pavodle źviestak vienhierskaha antykarupcyjnaha viedamstva NVVH, bujnyja sumy ŭ roznych valutach byli schavanyja ŭ lesie, sielskahaspadarčych pabudovach, składskich pamiaškańniach i žyłym domie padazravanaha. Jašče častku hrošaj znajšli ŭ tajniku ŭ siejfie, piša BILD.
U centry rasśledavańnia znachodzicca Mikłaš Šastak, były ministr nacyjanalnaha raźvićcia va ŭradzie Viktara Orbana. Miarkujecca, što jon atrymaŭ kala 34 miljonaŭ jeŭra chabaru. Z kanca vieraśnia jon znachodzicca pad vartaj.
Šaastak — nie adziny čałaviek z atačeńnia Orbana, u dačynieńni da jakoha viadziecca rasśledavańnie. Na hetym tydni byŭ taksama aryštavany małodšy brat Orbana Aran. Jaho padazrajuć u handli ludźmi i akazańni cisku.
Akramia taho, pad vartaj znachodzicca były kiraŭnik Centralnaha banka Dziordź Matołčy. Pavodle prakuratury, havorka idzie pra złoŭžyvańnie srodkami fondu banka.
Novy premjer-ministr Vienhryi Pieter Madźjar paśla svajoj pieramohi na vybarach u krasaviku abiacaŭ vykryć złačynnuju sietku Orbana. Ciapier jon nazvaŭ vyjaŭleńnie miljonaŭ jeŭra ŭ Šastaka dokazam isnavańnia karumpavanaj sistemy.
«Ź siońniašniaha dnia dakazana, što Viktar Orban — mafijozny bos. Zrynuty mafijozny bos», — zajaviŭ Madźjar u Facebook.
Orban havoryć pra palityčnuju «tyraniju»
Siensacyjnaja znachodka miljonaŭ, imavierna, jašče bolš uzmocnić cisk na Orbana. Ciapier śledčym treba vyśvietlić, adkul mienavita ŭzialisia hetyja hrošy i chto jašče moh być uciahnuty ŭ hetuju karupcyjnuju sistemu.
Sam Orban adchilaje abvinavačańni. Rasśledavańni i aryšty jon nazyvaje palityčnaj «tyranijaj», z dapamohaj jakoj jaho chočuć vycieśnić z palityčnaj sceny.
Novaje antykarupcyjnaje viedamstva NVVH było stvorana na padstavie zakonaprajekta ŭrada Madźjara, prapanavanaha ŭ lipieni 2026 hoda. Jašče padčas pieradvybarnaj kampanii stvareńnie hetaha viedamstva było adnym z hałoŭnych abiacańniaŭ Madźjara.
Kamientary