Ejsmant raźličvaje, što na pieramovach pa Ukrainie spracujuć biełaruskija karani Kušniera

Natalla Ejsmont vykazałasia pra Kušniera ŭ intervju rasijskamu prapahandystu Paŭłu Zarubinu dla «Viestiej».

«My daŭno viedajem, što Kušnier rodam ź Biełarusi. Ci moža heta dapamahčy? Tut nijakich acenačnych momantaŭ być nie moža. Ale toje, što hetyja ludzi ŭdzielničajuć u pracesie, prynamsi moža nadzieju nam z vami ŭsialać. Hetyja ludzi zadziejničanyja nastolki aktyŭna i nastolki hłyboka, i my, viadoma, možam tolki raźličvać, što našy biełaruskija karani spracujuć», — zajaviła jana.

Rasijskija «Viesti» pišuć, što va ŭsich amierykanskich pradstaŭnikoŭ, jakija ŭdzielničali ŭ pieramovach u Abu-Dabi, biełaruskija karani. U pryvatnaści, śpiecpasłańnik amierykanskaha prezidenta Styvien Uitkaf, ziać Donalda Trampa Džared Kušnier i hłaŭkam abjadnanymi US NATA ŭ Jeŭropie Aleksus Hrynkievič majuć słavianskija karani.

Ź Biełaruśsiu Kušniera źviazvaje pachodžańnie jaho siamji. Jaho babula i dziadula — jaŭrei z Navahrudčyny, jakija pieražyli Chałakost. Babula ŭciakła z Navahrudskaha hieta praz padziemny chod i dałučyłasia da partyzanskaha atrada bratoŭ Bielskich.

Biełaruskija karani maje i hałoŭnakamandujučy abjadnanymi siłami NATA ŭ Jeŭropie Aleksus Hrynkievič, jaki dałučyŭsia da pieramoŭ u Abu-Dabi. Jaho pradzied Illa Hrynkievič emihravaŭ ź Minska ŭ ZŠA ŭ 1899 hodzie. U Ńju-Jorku jon ažaniŭsia z uradženkaj Vilni Nastaśsiaj Śnihierevič.

Pachodžańnie śpiecpasłańnika Trampa Styva Uitkafa dziaržaŭnyja miedyja sprabujuć taksama źviazać ź Biełaruśsiu. U lutym Biełta apublikavała materyjał pad nazvaj «Hrodzienskija karani Styva Uitkafa: hienietyčnaja pamiać i što zachoŭvajuć archiŭnyja fondy?».

U im Biełta źviazvała z Hrodnam babulu Styva Uitkafa Roŭz Uitkaf, u dziavoctvie Rozu Pamieraniec. U miascovych archivach sapraŭdy sustrakajecca proźvišča Pamieraniec. Adnak i BiełTA adznačała: kab źviazać hetyja dakumienty ź siamjoj Uitkafa, patrebnyja dadatkovyja źviestki.

Niahledziačy na heta, materyjał zaviaršaŭsia razvahami hrodzienskaha kandydata histaryčnych navuk Alaksandra Arłukieviča pra toje, što Tramp vybiraje mocnych ludziej, histaryčna źviazanych ź Biełaruśsiu, i što «hienietyčnaja pamiać» maje značeńnie.

«Dla vykanańnia najvažniejšych daručeńniaŭ, adnym ź jakich, niesumnienna, źjaŭlajucca rasijska-amierykanskija pieramovy, Tramp vybiraje mocnych, daśviedčanych ludziej, i tak atrymlivajecca, što hetyja ludzi źviazanyja svaimi histaryčnymi karaniami ź Biełaruśsiu. Jak kaža kiraŭnik našaj dziaržavy, našy ludzi — sa znakam jakaści», — skazaŭ tady Arłukievič.

• 0
• 0
• 0
• 0
• 0
• 0
• 0
• 0