«Spadziajusia, ty pamreš i pazbaviš nas ad pakut». Paśla adstaŭki kiraŭnika Nvidia Džensena Chuanha praz špijonski skandał padnačalenyja raskazali pra jahonyja isteryki

Były hienieralny dyrektar karparacyi Nvidia 63‑hadovy Džensen Chuanh, jaki 12 listapada 2026 hoda pajšoŭ u adstaŭku, na praciahu hadoŭ trymaŭ u strachu kiraŭnictva kampanii i rehularna ładziŭ žorstkija raznosy na šmathadzinnych naradach. Pra heta paviedamlaje amierykanskaje vydańnie New York Post.

Pavodle słoŭ insajdaraŭ, adzin z samych hučnych incydentaŭ adbyŭsia ŭ lutym 2026 hoda padčas zakrytaj narady z udziełam bolš jak 30 top-mieniedžaraŭ Nvidia. Tady Chuanh niečakana nakinuŭsia na vykanaŭčaha vice-prezidenta pa hłabalnych apieracyjach Džeja Pury, jaki adkazvaŭ za prodažy i raźvićcio biznesu.

«Ja spadziajusia, ty zachvareješ na hryp i tabie stanie jašče horš, — zajaviŭ Chuanh svajmu namieśniku pierad ašałomlenymi kalehami, paśla čaho dadaŭ: — Ja spadziajusia, ty pamreš i pazbaviš nas usich ad pakut».

Pury vysłuchaŭ abrazy moŭčki, a paźniej pierajšoŭ na pasadu staršaha daradcy kampanii. Jak adznačyŭ adzin ź vidavočcaŭ sustrečy, usie prysutnyja pryzvyčailisia da taho, što hienieralny dyrektar kryčyć na ludziej, ale paśla pažadańnia śmierci ŭ zale zapanavała napružanaja cišynia.

Kidańnie butelkami 

Situacyja paharšałasia niezvyčajnaj karparatyŭnaj strukturaj Nvidia, dzie bolš za 60 top-mieniedžaraŭ padparadkoŭvalisia niepasredna Chuanhu. Supracoŭniki ździŭlajucca, što historyi pra jahonyja ŭspyški hnievu ŭ štab-kvatery ŭ kalifarnijskaj Santa-Kłary nie pratačylisia ŭ presu da jahonaha publičnaha krachu.

Krynicy vydańnia pryvodziać jašče niekalki epizodaŭ. Padčas trochhadzinnaj narady ŭ 2025 hodzie ŭ prysutnaści kala 40 rabotnikaŭ Chuanh zajaviŭ adnamu z kiraŭnikoŭ adździeła prodažaŭ: «Ty ni chalery nie razumieješ u maim biznesie». Na inšaj sustrečy jon vyhnaŭ z zały top-mieniedžara, jaki ŭpieršyniu trapiŭ na naradu z kiraŭnikom kampanii, zakryčaŭšy: «Ty što, uchmylaješsia mnie? Ja baču tolki miortvyja tvary… Preč adsiul!».

A padčas jašče adnaho pasiadžeńnia ŭ štab-kvatery miljarder u prystupie lutaści špurnuŭ u adnaho z dyrektaraŭ butelku z vadoj.

Anałahičnym čynam Chuanh pavodziŭ siabie i ź finansavaj dyrektarkaj Nvidia Kolet Kres, jakaja ciapier, paśla jahonaj adstaŭki, časova ŭznačaliła karparacyju. Na žnivieńskaj sustrečy jon hruba pierapyniŭ jaje prezientacyju i paraŭnaŭ Kres z «aleniem, jaki zastyŭ u śviatle far».

Nie cyrymoniŭsia biznesoviec i sa źniešnimi partniorami. Na kanfierencyi ŭ Bierlinie za stałom z šaściu hienieralnymi dyrektarami vobłačnych kampanij, jakija zakuplajuć čypy Nvidia, Chuanh raskazaŭ prypavieść pra vuličnaha pradaŭca supu ŭ Japonii.

Pavodle jaho słoŭ, adstajaŭšy doŭhuju čarhu, jon pakaštavaŭ najsmačniejšy sup i paprasiŭ druhuju porcyju, ale kuchar admoviŭ, bo inakš ježy nie chapiła b astatnim ludziam u čarzie. Zakončyŭšy historyju, Chuanh zajaviŭ kiraŭnikam karparacyj: «Jon najlepšy biznesmien, čym vy ŭsie. Vy nie farmujecie kaštoŭnaść maich praduktaŭ».

Bijohraf miljardera Styvien Uit, aŭtar knihi «Mašyna, jakaja myślić», u čaćvier napisaŭ u kałoncy dla The New York Times, što publičny vobraz Chuanha z apoviedami pra myćcio posudu ŭ maładości i ščodrymi čajavymi ŭ prydarožnych kaviarniach Denny's słužyŭ tolki šyrmaj:

«Heta było patrebna, kab prykryć jahonuju pychu. Jon amal nie ciarpieŭ niazhody i byŭ niazdolny da adkrytaj dyskusii. Kali vy piarečyli jamu navat u drobiazi, heta było jak padpalić knot: varta było nastajać na svaim, jak jon vybuchaŭ i kryčaŭ na vas za vaš idyjatyzm».

Suviaź z kitajskaj špijonkaj 

Krach karjery Džensena Chuanha adbyŭsia ŭ čaćvier, 12 listapada, kali jon byŭ vymušany padać u adstaŭku paśla pryznańnia ŭ pazašlubnaj suviazi z Elis Chuanh — svajoj ciozkaj pa proźviščy, jakuju amierykanskija śpiecsłužby padazrajuć u špijanažy na karyść Kitaja. Ciaham bolš jak hoda biznesoviec uvodziŭ u zman top-mieniedžaraŭ Nvidia i niekalki dzion publična admaŭlaŭ hetyja adnosiny, pakul nie pryznaŭ praŭdu. Pavodle źviestak miedyja, ahułam kiraŭnik karparacyi mieŭ tajemnyja ramany prynamsi z tryma žančynami, uklučajučy vice-prezidentku Nvidia pa achovie zdaroŭja Kimbierli Paŭeł.

U aficyjnym pres-relizie Nvidia ab pakidańni pasady zasnavalnika nie pryvodziłasia nivodnaj jahonaj cytaty.

Ciapier Chuanh naniaŭ elitnuju jurydyčnuju firmu Paul Weiss i rychtujecca davać pakazańni ŭ Kanhresie ZŠA.

Amierykanskija zakanadaŭcy patrabujuć raskryć padrabiaznaści supracoŭnictva Nvidia ź sinhapurskaj kampanijaj u śfiery štučnaha intelektu Megaspeed, jakuju ŭznačalvaje Elis Chuanh.

Ułady ZŠA daŭno padazrajuć hetuju firmu ŭ kantrabandzie pieradavych amierykanskich čypaŭ u Kitaj u abychod sankcyj, choć sama kampanija abvinavačańni adchilaje.

Kanhresmieny taksama majuć namier dapytać Džensena Chuanha i ministra handlu ZŠA Hovarda Łatnika pra ich rolu ŭ strymlivańni žorstkaha ekspartnaha kantrolu, jaki moh by pieraškodzić struktury Elis Chuanh atrymać dostup da stratehičnaha abstalavańnia.

• 0
• 0
• 0
• 1
• 0
• 0
• 0
• 0