Adna z samych masavych haziet Rasii napisała pra «źniaćcie tabu na likvidacyju» Zialenskaha

U subotu «Moskovskij komsomolec», adna z samych masavych haziet u Rasii, apublikavała natatku pra toje, što «Rasija źniała niehałosnuju zabaronu na likvidacyju Zialenskaha i ŭsiaho kiraŭnictva Hienštaba USU». U materyjale sa spasyłkaj na nienazvanyja telehram-kanały paviedamlajecca, što pradstaŭniki siłavoha błoka nibyta pierakanali Uładzimira Pucina ŭ nieabchodnaści zabić kiraŭnictva Ukrainy, uklučajučy Uładzimira Zialenskaha.

Aŭtarka publikacyi kala 20 hadoŭ pracuje ŭ adździele siłavych struktur vydańnia, a sam materyjał byŭ raźmieščany na hałoŭnaj staroncy haziety.

Natatka vyjšła ŭ «MK» pad zahałoŭkam «Tabu źniata: na zakrytaj naradzie Rady biaśpieki pryniali rašeńnie ab likvidacyi Zialenskaha».

U publikacyi havorycca, što rašeńnie «ab mahčymym źniaćci tabu na likvidacyju Zialenskaha i vysokapastaŭlenych aficeraŭ USU» nibyta «było pryniataje pa vynikach zakrytaj narady Rady biaśpieki Rasii».

«Takim čynam, siłaviki prapanavali pierajści da bolš radykalnaha vyrašeńnia pytańnia, a mienavita da źniščeńnia tych, chto addaje zahady ab udarach pa rasijskich abjektach», — havorycca ŭ natatcy.

Svaje krynicy infarmacyi vydańnie abaznačaje tak: «Pra heta ŭ piatnicu, 13 listapada, napisali niekatoryja vajennyja kanały sa spasyłkaj na ŭłasnyja krynicy, a taksama šerah internet-ŚMI».

Aŭtarkaj natatki paznačanaja karespandentka adździeła siłavych struktur Darja Fiadotava, jakaja pracuje ŭ haziecie z 2006 hoda. Śpiecyjalizacyja žurnalistki, jak havorycca na sajcie, — dziejnaść MNS, MUS, Hienprakuratury i inšych siłavych struktur.

Jana ŭznaharodžanaja miedalami MNS, maje padziaku kiraŭnika MUS i šerah inšych viedamasnych uznaharod. Fiadotava aśviatlała viadomyja sudovyja pracesy, u tym liku spravy Kiryła Siarebreńnikava, Alaksieja Ulukajeva i Alaksieja Navalnaha.

Na hetym tydni za podpisam Fiadotavaj u «MK» taksama vyjšła publikacyja pra toje, što Ukraina nibyta «mahła vyprabavać atamnuju bombu» pad Kijevam.

Ranicaj u niadzielu materyjał byŭ dastupny na hałoŭnaj staroncy vydańnia.

Pavodle servisu TgStat, pieršym pra toje, što «Rada biaśpieki RF zapatrabavaŭ likvidacyi vyšejšaha vajennaha kiraŭnictva Ukrainy», u sieradu ŭ 15:41 napisaŭ telehram-kanał «Dnievnik raźviedčika» (147 tysiač padpisčykaŭ).

U piatnicu ranicaj tekst pieradrukavaŭ kanał «Akadiemija» (3588 padpisčykaŭ). U jaho apisańni havorycca, što «Akadiemija» — heta trenirovačny centr «vieteranaŭ śpiecpadraździaleńnia antyteroru «Alfa» Krasnadara».

«Dnievnik raźviedčika» sa spasyłkaj na «vysokapastaŭlenyja krynicy» nazvaŭ «katalizataram hetaha demaršu hienieralitetu» «bieśpierapynnyja naloty na bałtyjski ekspartny vuzieł (najpierš dziasiaty pa liku ŭdar pa porcie Uść-Łuha)».

«Vajskoŭcy dakazali pieršaj asobie: zmahacca ź biaskoncym rojem kapieječnych dronaŭ biessensoŭna — nieabchodna źniščać sam łancužok pryniaćcia rašeńniaŭ», — havorycca ŭ dopisie.

Pra abmierkavańnie «źniaćcia tabu na likvidacyju Zialenskaha» ŭ toj ža dzień sa spasyłkaj na «Akadiemiju» napisała vydańnie «Błoknot», zasnavanaje palittechnołaham i byłym deputatam Dziarždumy Aleham Pachołkavym.

U subotu, užo paśla «MK», padobnuju publikacyju vypuściła vydańnie EAdaily.

Publikacyja «MK» vyklikała rezanans va ŭkrainskich ŚMI. Siarod tych, chto napisaŭ pra heta, byli «RBK-Ukraina», «24 kanał», «Diałoh.ua» i «Hordon.ua».

Paviedamleńni prakamientavali niekalki bujnych Z-błohaŭ. Kanał «Dva majora» (1,1 miljona padpisčykaŭ) napisaŭ, što «chaciełasia b vieryć u hetyja dobryja naviny».

Aktrysa Jana Papłaŭskaja (168 tysiač padpisčykaŭ) napisała, što «tak heta ci nie, pakaža tolki realnaje źniščeńnie».

Kanał «Złoj Pruf» (604 tysiačy padpisčykaŭ) napisaŭ, što «tema nabalełaja i vielmi aktualnaja», ale «adna sprava — bałbatać, pieradrukoŭvajučy bulvarnyja hazietki, inšaja — likvidavać».

Na pačatku ŭvarvańnia va Ukrainu paviedamlałasia pra sproby rasijskich śpiecsłužbaŭ i vajskoŭcaŭ zabić Zialenskaha.

U sakaviku 2022 hoda tahačasny premjer-ministr Izraila Naftali Bieniet, pavodle jaho słoŭ, atrymaŭ ad Pucina abiacańnie nie zabivać prezidenta Ukrainy.

U červieni ŭradavaja «Rośsijskaja hazieta» apublikavała kałonku vajennaha ekśpierta Juryja Knutava z prapanovaj likvidavać Zialenskaha.

• 0
• 0
• 0
• 3
• 0
• 0
• 1
• 0