U Biełarusi za apošnija hady likvidavali 40 pravasłaŭnych prychodaŭ
Maštabnaja chvala jurydyčnych čystak zakranuła struktury Biełaruskaj pravasłaŭnaj carkvy va ŭsich abłaściach krainy. Z kanca 2023 hoda dziasiatki relihijnych hramad aficyjna pazbavilisia rehistracyi abo apynulisia ŭ pracesie prymusovaha zakryćcia.
Jak vynikaje z sabranych danych inicyjatyvy «Chryścijanskaja vizija», u pieryjad ź listapada 2023 hoda da 13 listapada 2026 hoda ŭ Biełarusi zafiksavana 40 vypadkaŭ likvidacyi prychodaŭ Biełaruskaj pravasłaŭnaj carkvy. Analiz źviestak z Adzinaha dziaržaŭnaha rehistra (ADR) i padatkovych baz pakazvaje, što 34 relihijnyja abščyny ŭžo kančatkova pazbaŭlenyja jurydyčnaha statusu. Jašče šeść arhanizacyj na hety momant prachodziać aficyjnuju praceduru spynieńnia dziejnaści.
Praces zakryćcia zakranuŭ usie rehijony krainy biez vyklučeńnia. Najbolšaja kolkaść skasavanych hramad prypadaje na Hrodzienskuju vobłaść, dzie jurydyčny status stracili dzieviać prychodaŭ. U Bresckaj, Minskaj i Mahiloŭskaj abłaściach zafiksavana pa siem takich vypadkaŭ, a ŭ Viciebskaj i Homielskaj — pa piać.
Zhodna z vypiskami ź dziaržaŭnych rejestraŭ, pad jurydyčny nož traplajuć pieravažna nievialikija viaskovyja hramady. Siarod ich — prychody ŭ vioscy Dziatłavičy Vaŭkavyskaha rajona, Vialikaja Śviancica i Jatviesk Śvisłackaha rajona, Zarečča Rahačoŭskaha rajona, Šychaŭ Žłobinskaha rajona, a taksama Paniacičy na Vilejščynie. Zychodziačy z dakumientaŭ, mnohija z hetych relihijnych hramad atrymali aficyjnuju rehistracyju jašče ŭ pačatku 1990‑ch hadoŭ, adnak ciapier miascovyja vykankamy i padatkovyja inśpiekcyi inicyjavali ich zakryćcio.
Usie šeść niezavieršanych pracedur likvidacyi, jakija fiksujucca ciapier, adnosiacca da prychodaŭ Bresckaj i Mahiloŭskaj abłaściej. Pry hetym u šerahu vypadkaŭ pastanovy ab likvidacyi vynosiać nie miascovyja orhany ŭłady, a sudovyja instancyi. Tak, rašeńnie ab spynieńni dziejnaści relihijnaj abščyny ŭ vioscy Niasiata Kličaŭskaha rajona było pryniataje Mahiloŭskim abłasnym sudom 25 červienia 2026 hoda. Roŭna praź miesiac, 26 lipienia 2026 hoda, hety ž sud pastanaviŭ likvidavać pravasłaŭny prychod u vioscy Ciacieryna Kruhlanskaha rajona.
Aficyjnyja padstavy i matyvirovačnyja častki dla vyniasieńnia padobnych sudovych rašeńniaŭ u adkrytych bazach danych nie publikujucca. Daśledčyki adznačajuć, što sabranyja źviestki pakazvajuć vyklučna dakumientalna vyjaŭlenyja fakty i nie źjaŭlajucca vyčarpalnaj statystykaj ab ahulnym skaračeńni kolkaści struktur BPC u krainie.
-
U Biełarusi pierastała pracavać sistema anłajn-kantrolu za rucham tavaraŭ — ad šyn da fienaŭ. Heta nie pieršy taki zboj sioleta
-
«A jak ty vykupiŭ adrazu akcent?» Repier Basta pa hołasie paznaŭ muzykanta z Čavusaŭ i raskazaŭ pra svajo dziacinstva ŭ zakrytym haradku pad Dziatłavam
-
Amal 400‑mietrovy puciepravod pamiž Kamiennaj Horkaj i Lebiadzinym abiacajuć adkryć da kanca hoda
Kamientary