Urad Čechii pazbaŭlaje hramadskija miedyja finansavaj niezaležnaści. U adkaz u Prazie pačaŭsia najbujniejšy pratest z 1989 hoda

Jak paviedamlaje vydańnie The Insider sa spasyłkaj na češskaje infarmacyjnaje ahienctva ČTK, arhanizatary aceńvajuć kolkaść udzielnikaŭ niadzielnaj demanstracyi ŭ 350—450 tysiač čałaviek. Natoŭp całkam zapoŭniŭ Letenskuju raŭninu i prylehły da jaje park, ludzi załazili na drevy, što pryviało da pierabojaŭ u pracy hramadskaha transpartu i mietro. Kali hetyja ličby paćvierdziacca, ciapierašniaja akcyja stanie samaj maštabnaj u krainie z časoŭ Aksamitnaj revalucyi, jakaja pakłała kaniec kamunistyčnamu režymu ŭ Čechasłavakii. Palicyja ŭłasnyja padliki pakul nie publikavała.

Nahodaj dla vystupu staŭ zakonaprajekt urada premjer-ministra Andreja Babiša ab źmienie paradku finansavańnia Češskaha telebačańnia (ČT) i Češskaha radyjo (ČRo). Dahetul hramadskija viaščalniki isnavali za košt abaviazkovych zboraŭ z nasielnictva i biźniesu, adnak ułady majuć namier skasavać hetuju praktyku i pieravieści vydańni na pramoje finansavańnie ź dziaržaŭnaha biudžetu.

Pry hetym, jak adznačaje ahienctva Reuters, ahulny abjom srodkaŭ dla miedyja skarocicca prykładna na 15 %. Pradstaŭniki redakcyj śćviardžajuć, što ŭ naminalnym vymiareńni biudžet telebačańnia adkacicca da ŭzroŭniu 2008 hoda, a radyjo — da pakazčykaŭ 2005 hoda, što stavić pad pahrozu ich pracu.

Načnaja pastanova 

Arhanizataram pratestu pad łozunham «Ruki preč ad miedyja» vystupiŭ ruch «Miljon imhnieńniaŭ dla demakratyi» (Milion chvilek pro demokracii). Samu akcyju nazvali «Letna suprać 4:36» — heta pramaja adsyłka da času, kali kiroŭnaja kaalicyja damahłasia ŭchvaleńnia zakonaprajekta ŭ pieršym čytańni. Hałasavańnie adbyłosia 24 kastryčnika a 4:36 ranicy. Pratestoŭcy patrabujuć adklikać dakumient, prynieści hramadzianam prabačeńni za taki farmat razhladu i pačać publičnaje abmierkavańnie reformy z udziełam niezaležnych ekśpiertaŭ.

Chutka patrabavańni manifiestantaŭ vyjšli za miežy abarony svabody słova. Udzielniki akcyi zaklikali adpravić u adstaŭku staršyniu nižniaj pałaty parłamienta Tomia Akamuru — lidara ŭltrapravaj partyi «Svaboda i pramaja demakratyja» (SPD). Akramia taho, ludzi patrabujuć pazbavić hetuju palityčnuju siłu kantrolu nad Ministerstvam abarony. Associated Press fiksuje, što ŭrad naŭprost abvinavačvajuć u asłableńni abaranazdolnaści Čechii na fonie rasijskaj pahrozy.

Reakcyja Babiša 

Miljarder Andrej Babiš, jaki viarnuŭsia ŭ kresła premjer-ministra ŭ śniežni 2025 hoda dziakujučy kaalicyi svajoj partyi ANO z pravaradykałami i partyjaj «Aŭtamabilisty za siabie», adstupać nie płanuje. Kamientujučy niadzielnuju demanstracyju, jon zajaviŭ, što pavažaje prava hramadzian na pratest, ale ŭrad nie admovicca ad skasavańnia televizijnych i radyjozboraŭ.

«Mianiajecca sistema finansavańnia. Nichto nie choča kantralavać hramadskija miedyja, nichto nie choča ŭkazvać im, što kazać i rabić, nichto nie choča ich nacyjanalizavać», — padkreśliŭ kiraŭnik urada.

Vuličnaje supraćstajańnie ŭ Prazie narastała ciaham usiaho hoda. Jašče ŭ sakaviku 2026 hoda ruch suprać kabinieta Babiša sabraŭ na Letenskaj raŭninie zvyš 200 tysiač čałaviek. U pačatku listapada supracoŭniki Češskaha telebačańnia i radyjo praviali adnadzionnuju zabastoŭku suprać biudžetnaj reformy, jakuju tady padtrymali prafsajuzy, studenty i dziejačy kultury.

• 0
• 0
• 0
• 0
• 0
• 0
• 0
• 0