Мітрапаліт Павел любіць прыгожы спорт і заклікае адмовіцца ад азартных гульняў
Мітрапаліт Павел на прэс-канферэнцыі 13 мая ў Мінску прызнаўся, што яму падабаецца «прыгожы спорт».
«Мне падабаецца прыгожы хакей, футбол, — сказаў ён. — Калі быў студэнтам семінарыі, я гуляў у валейбол, гэта мой любімы спорт. Калі быў маленькі, ганяў у футбол».
Праваслаўны іерарх паведаміў, што іншым разам глядзіць снукер (від гульні ў більярд, які адрозніваецца працягласцю партый) і нават «сам іншым разам захапляўся гульнёй у більярд». «Чэмпіянат свету па футболе я гляджу. Але гэта не азначае, што я за кагосьці перажываю. Мне падабаецца, калі прыгожа гуляюць, але калі б'юць, робяць нейкія падсечкі, прымяняюць фізічную сілу, нядаўна я даведаўся, што там камусьці яшчэ і шыю зламалі…» — сказаў ён.
Сёння сам спорт «адыходзіць на другі план», са шкадаваннем зазначыў мітрапаліт Павел, а найбольш ярка праяўляецца «такі складнік, як бізнес».
Ён расказаў, што аднойчы пабываў у амерыканскай сталіцы азартных гульняў Лас-Вегасе, «паглядзеў, як там гуляюць». Уладыка падкрэсліў, што не гуляе «ў азартныя гульні, тым больш з дзяржавай», і параіў усім так рабіць. Адпаведнае ж стаўленне ў яго і да латарэй.
«Хочацца пажадаць, каб спорт развіваўся, каб у людзей быў добры спартыўны кірунак інтарэсу, але калі гэта ператвараецца ў жорсткі азарт, калі людзі робяць на стадыёне стаўкі і, нічога не атрымаўшы, пачынаюць кідаць выбуховыя пакеты — я супраць гэтага», — дадаў мітрапаліт.
Цяпер чытаюць
Ад прыватнікаў патрабуюць завесці ідэолага ў штаце — распыталі, што робяць кампаніі17
Каментары