Беларусь можа рэальна прэтэндаваць на арганізацыю яшчэ аднаго чэмпіянату свету па хакеі, заявіў старшыня федэрацыі па гэтым відзе спорту Яўген Ворсін на прэс-канферэнцыі ў Мінску 29 мая.
У той жа час, паводле яго слоў, гэта магчыма не раней за 2020 год: чэмпіянаты 2015-2018 гадоў ужо набылі гаспадароў, а на першынство 2019 прэтэндуе вельмі сур'ёзны канкурэнт Славакія. «У нас ёсць час падумаць і ўзважыць усе шанцы», — адзначыў Ворсін.
Між тым, знаходзячыся на чэмпіянаце свету ў Мінску, прэзідэнт Міжнароднай федэрацыі хакея Рэнэ Фазель заявіў, што правядзенне сусветнага першынства ў адным горадзе з'яўляецца хутчэй выключэннем. ІІХФ вітае арганізацыю турніру такога ўзроўню ў розных гарадах і краінах, як гэта было ў 2012 і 2013 гадах у Фінляндыі і Швецыі і будзе ў 2017 годзе ў Германіі і Францыі.
«Такая заява не памяншае нашы шанцы, — лічыць Ворсін. — Чэмпіянат у розных краінах больш складана арганізаваць, чым у адной краіне і ў адным горадзе. Акрамя таго, адна з умоў — зборная павінна гуляць у топ-дывізіёне».
Каментары