Уплывовае расейскае радыё гадзіну вяшчала па-беларуску
«Беларускую гадзіну» ў рамках начнога шоў правяла журналістка, якая вырасла ў Беларусі
«Эхо Москвы», самае папулярнае расейскае размоўнае радыё, у ноч зь пятніцы на суботу цэлую гадзіну вяшчала на беларускай мове. «Беларускую гадзіну» ў рамках начнога шоў правяла журналістка Аліна Грабнёва, якая вырасла ў Беларусі. У праграме гучала беларуская музыка, слухачы і вядучая абмяркоўвалі пытаньні санкцый супраць Расеі, беларускае і расейскае палітыкі.
У ініцыятыве «Эха» спачатку адчувалася пэўная жартавасьць, маўляў, вырашылі «па прыколу» правесьці гадзіну этэра на «прыкольнай» беларускай мове. Але ўжо зь першых хвілінаў «прыкольнасьць» імкліва перарасла ў шчырасьць і пазытыў. Тэлефанавалі (а трэцяй гадзіне ночы!) і беларусы, і расейцы, якія зь Беларусі зьехалі трыццаць гадоў таму і якія мову вывучалі толькі ў школе, усе радаваліся. Радыёвядучая рабіла памылкі, кульгала з вымаўленьнем, але чым далей, тым гаварыла больш упэўнена.
Попыт на беларускую мову ёсьць і заўжды будзе, нават у Маскве,
ня кажучы нават пра ўшчэнт зрусіфікаваную сучасную Беларусь. Не абавязкова адразу пераводзіць на беларускую мову выкладаньне ядравай фізыкі ці мікрабіялёгіі, але для яе абсалютна відавочна ёсьць нішы і ёсьць попыт па-за межамі якіхсь філялёгіі і этнаграфіі. Дзіўна, што беларускія ўлады гэтага не разумеюць і ня могуць зрабіць хаця б адзін з сваіх пяці ці колькі там агульнанацыянальных тэлеканалаў цалкам беларускамоўным (як гэта было б, калі б у Беларусі было сапраўднае раўнапраўнае дзьвюхмоўе).
Самі ж падумайце, якая ганьба: у сьвеце ёсьць толькі адзін беларускамоўны тэлеканал - і той фінансуецца ўрадам Польшчы.
Паслухаць беларускую мову ў этэры «Эха Москвы» можна тут (слухаць з гадзіны 2:00): http://echo.msk.ru/sounds/1406788.html
Цяпер чытаюць
У Шэймана знайшлі яшчэ адну магчымую каханку і сына. Сакратарка без вышэйшай адукацыі за лічаныя гады стала ўласніцай раскошных дамоў і гандлёвага цэнтра12
У Шэймана знайшлі яшчэ адну магчымую каханку і сына. Сакратарка без вышэйшай адукацыі за лічаныя гады стала ўласніцай раскошных дамоў і гандлёвага цэнтра
«Што, грохнуць дзяцей Ціханоўскай, каб звярнулі ўвагу на маю праблему?» Як тупы каментар актывіста Дзяніса Дашкевіча стварыў яму праблемы ў Польшчы2929
Каментары