Сёньня ў сталічным мікрараёне Малінаўка мелася адбыцца сустрэча лідэра Руху "За свабоду" зь мясцовымі жыхарамі, але амаль адразу палітык быў затрыманы і адвезены ў РУУС Маскоўскага раёну. Празь дзьве з паловай гадзіны Аляксандра Мілінкевіча, усё ж, адпусьцілі.
Да «Максімуса» прыйшло каля сотні чалавек, а таксама больш за сорак амапаўцаў і людзей у цывільным, паведаміў палітоляг Алесь Лагвінец. Мілінкевічу нават не далі выступіць, ягоным затрыманьнем кіраваў падпалкоўнік міліцыі Мікалай Рудскі.
Цяпер экс‑кандыдата на пасаду прэзыдэнта вязуць у Маскоўскі РУУС для «высьвятленьня асобы».
***
20:01Алесь Лагвінец паведаміў, што ў пастарунку праз шкло ён бачыў А. Мілінкевіча. Тым ня менш, падпалкоўнік Рудскі пры выхадзе з пастарунку сказаў, што нікога не затрымліваў. Дзяжурны РУУС таксама адказвае: "Нікакога гаспадзіна Мілінкевіча ў "дзяжурцы" няма".
Каля пастарунку знаходзяцца журналісты, паплечнікі і сябры А. Мілінкевіча.
***
20:39 А 20.35 Аляксандар Мілінкевіч быў адпушчаны.
Як паведаміў палітык "Нашай Ніве",
"У пастарунку я меў размовы на сацыяльныя, эканамічныя, палітычныя, міжнародныя тэмы з супрацоўнікамі РУУС. Размова пачалася ў кабінэце начальніка РУУС. Пасьля мяне перавялі да ягонага намесьніка па ідэалёгіі. Калі я запытаўся: "Ці затрыманы я, ці магу ісьці, мяне зноў накіравалі да начальніка, дзе мы яшчэ раз зь ім пагутарылі. Міліцыянты былі вельмі ветлівыя".
"Ніякіх позваў мне не выпісвалі, прычыну затрыманьня таксама не патлумачылі. Толькі на самым пачатку мне сказалі, што вязуць у пастарунан для нейкага тлумачэньня і высьвятленьня. Не выключаю, што ў той час як я знаходзіўся ў РУУС, вырашалася, ці арыштоўваць мяне ці пакідаць на свабодзе. Думаю, што ўлады баяцца такіх сустрэч зь людзьмі, баяцца любога вольнага слова, і таму адбываюцца такія затрыманьні, калі яны бачаць, што нехта спрабуе згуртаваць людзей".
Цяпер чытаюць
Той самы масажыст расказаў, навошта здымаў голых кліентак2
Каментары