Суд завочна аштрафаваў Змітра Дашкевіча на 735 рублёў за паход у барбершоп «Чэкіст»
Суд Цэнтральнага раёна Мінска завочна асудзіў Змітра Дашкевіча і аштрафаваў на 30 базавых велічынь — 735 рублеў, піша Радыё Свабода.
Суд прызнаў Дашкевіча вінаватым у дробным хуліганстве падчас наведвання барбершопа «Чэкіст» 9 студзеня.
Група актывістаў на чале са Змітром Дашкевічам і блогерам Эдуардам Пальчысам правяла гутарку з супрацоўнікамі барбершопа, спрабавала развесіць плакаты з прозвішчамі больш як сотні беларускіх інтэлігентаў, забітых у кастрычніцкую ноч 1937 года.
Актывісты спрабавалі давесці, што «называцца супрацоўнікам карнага органа, які спрычыніўся да масавых рэпрэсій, — гэта як мінімум дэманстраваць няведанне гісторыі» і што «з такім жа поспехам, можна было ўзяць назву «Гестапавец».
Згодна з міліцэйскім пратаколам аб адміністрацыйным парушэнні, Дашкевіч «настырна навязваў сваю прысутнасць», «у [неразборліва] форме патрабаваў змяніць назву і мэблю» і «наўмысна парушаў дзейнасць» установы, чым выявіў «непавагу да грамадства». Сьведкамі выступілі супрацоўнікі барбершопа Ілля Мятліцкі і Алег Кот.
Каментары