Жонка Вітольда Ашурка: Раней ніякіх праблем з сэрцам у яго не было
21 мая стала вядома, што ў шклоўскай калоніі памёр 50-гадовы палітвязень з Бярозаўкі Вітольд Ашурак. 18 студзеня ў Лідзе на закрытым працэсе яму прысудзілі 5 гадоў калоніі агульнага рэжыму. Ашурак быў сябрам Партыі БНФ, каардынатарам руху «За свабоду», чалавек быў бясконца адданы Беларусі.
«Нічога не вядома. За выходныя мы нічога не даведаемся. Брат тэлефанаваў у магілёўскі Следчы камітэт, яму далі толькі стацыянарныя нумары следчых — яны не адказваюць. А субота і нядзеля — у іх выходныя. Так што, я думаю, да панядзелка мы ўвогуле нічога не даведаемся», — паведаміла «Белсату» жонка палітвязня Вольга.
Афіцыйная прычына смерці — спыненне сэрца. Але, кажа жонка, «сэрца ў яго было здаровае абсалютна». Разам з тым, адзначае яна, у яго быў трамбафлебіт, таксама ў каранціне ён мог заразіцца каранавірусам.
«Але гэта дадумкі, інфармацыі нуль», — падкрэсліла жонка Вітольда Ашурка.
Апошні ліст палітвязень напісаў ёй 30 красавіка.
«З таго часу ніводнага ліста не было. Вользе Быкоўскай ён яшчэ адзін ліст даслаў — і ўсё, больш лістоў ад яго са Шклоўскай калоніі не было. А ён часта пісаў. Раз на дзесяць дзён стабільна ад яго быў ліст. А тут не было ніякай інфармацыі», — падкрэсліла Вольга Ашурак.
Цяпер чытаюць
«На караблі кожны дзень — панядзелак». Беларуска расказала пра сваю працу на круізным лайнеры6
Каментары