Сёння пройдзе традыцыйная «Гадзіна Зямлі», на будынках адключаць падсвятленне
Традыцыйная акцыя «Гадзіна Зямлі» пройдзе 30 сакавіка, у Мінску ў гэты дзень адключаць падсвятленне на будынках з 20:30 да 21:30, піша агенцтва «Мінск-Навіны».
Як удакладнілі ў Мінгарвыканкаме, у адзначаны час патушаць падсвятленне самых вядомых будынкаў і помнікаў свету. Але гаворка ідзе не пра эканомію электрычнасці — гэта сімвал беражлівых адносін да прыроды і напамін, што дапамагчы планеце можна, змяніўшы свае звычкі.
Сярод такіх карысных звычак называюць разумны расход электраэнергіі і цяпла, эканомію вады і выбар на карысць другаснай перапрацоўкі паперы і іншых матэрыялаў.
Беларусь далучаецца да «Гадзіны Зямлі» з 2009 года. У Мінску ў гэтую гадзіну традыцыйна адключаюць падсвятленне стадыёна «Дынама», Беларускага дзяржаўнага музея гісторыі Вялікай Айчыннай вайны, архітэктурнага комплексу «Вароты Мінска», Белдзяржцырка і іншых знакавых будынкаў.
Простых людзей таксама заклікаюць на адну гадзіну выключыць святло і бытавыя электрапрыборы — у знак неабыякавасці да будучыні планеты.
Пры гэтым арганізатары акцыі не рэкамендуюць адключаць вулічнае асвятленне, аэранавігацыйныя агні і святлафоры ў мэтах бяспекі.
Каментары