Астранаўты Бутч Уілмар і Суні Уільямс вярнуліся на Зямлю пасля дзевяці вымушаных месяцаў у космасе
Пасля дзевяці месяцаў у космасе астранаўты NASA Бутч Уілмар і Суні Уільямс вярнуліся дадому. Яны павінны былі правесці на Міжнароднай касмічнай станцыі восем дзён, але іх місію давялося падоўжыць з-за тэхнічных праблем з караблём Starliner кампаніі Boeing, піша Бі-бі-сі.
Уілмар і Уільямс вярнуліся на Зямлю ў капсуле SpaceX Crew Dragon разам з астранаўтам NASA Нікам Хэйгам і расійскім касманаўтам Аляксандрам Гарбуновым.
Яны адстыкаваліся ад МКС у 5:05 па Грынвічы (8:05 па Мінску) у аўторак і прывадніліся каля ўзбярэжжа Фларыды вечарам таго ж дня.
«Спуск быў уражлівы, — сказала прадстаўніца NASA Джэйдэн Джэнінгс. — У нас былі аптымальныя ўмовы для прываднення».
Шлях ад МКС да паверхні Зямлі заняў 17 гадзін.
Спачатку капсула Crew Dragon увайшла ў атмасферу Зямлі, вытрымліваючы тэмпературу да 1600°C.
Тыя, хто знаходзіўся на борце, адчувалі значныя перагрузкі, прыкладна ў чатыры разы большыя за сілу зямнога прыцягнення.
Апарату ўдалося мякка прывадніцца з дапамогай чатырох буйных парашутаў.
Сага Суні і Бутча пачалася ў чэрвені 2024 года.
Астранаўты ўдзельнічалі ў першым выпрабаванні касмічнага карабля Starliner, распрацаванага Boeing.
Падчас палёту да касмічнай станцыі капсула сутыкнулася з шэрагам тэхнічных праблем, таму вяртанне астранаўтаў дадому палічылі занадта рызыкоўным.
У пачатку верасня мінулага года Starliner вярнуўся на Зямлю без экіпажа.
Гэта азначала, што для вяртання Бутча і Суні патрэбны быў новы карабель.
Таму NASA абрала наступны па графіку палёт: капсулу SpaceX, якая прыбыла на МКС у канцы верасня.
На капсуле Crew Dragon на станцыю прыляцелі два астранаўты замест чатырох, пакінуўшы два свабодныя месцы для Бутча і Суні.
Праблема была ў тым, што палёт SpaceX быў запланаваны на шэсць месяцаў, таму тэрмін знаходжання астранаўтаў на МКС быў падоўжаны да сакавіка 2025 года.
Прыбыццё зямнога экіпажа ў нядзелю ў рамках місіі Crew-10 стала апошнім крокам, неабходным для вяртання Бутча і Суні.
Пасля кароткай перадачы спраў новай камандзе іх місія падышла да канца.
Цяпер чытаюць
Ціханоўская: Дзеці не пераехалі ў ЗША, а проста часова будуць з татам дзеля бяспекі26
Каментары