Некаторыя ўладальнікі кватэр, жадаючы павялічыць жылую плошчу, аб’ядноўваюць у адну прастору лоджыю і суседні пакой з пераносам радыятара з падаконнай сцяны ў іншае месца. Якімі наступствамі можа абярнуцца такая перапланіроўка, даведаліся «Мінск-Навіны» ў ЖЭУ № 3 Першамайскага раёна.
Паслугі па пашырэнні пакоя за кошт лоджыі або балкона прапануюць некаторыя сталічныя кампаніі, якія спецыялізуюцца на рамонтных працах. Так, адна з арганізацый запэўнівае патэнцыяльных заказчыкаў, што зробіць перапланіроўку «прафесійна», абяцаючы «строга па дзяржстандартах» зрабіць «дэмантаж балконнага блока, шкленне лоджыі цёплым шклопакетам, уцяпленне і аздабленне ўнутры».
— Такі від перапланіроўкі забаронены: павелічэнне плошчы памяшкання, якую ацяпляюць, за кошт далучэння нават ідэальна ўцепленых балкона або лоджыі прыводзіць да цепластрат — сістэма цеплазабеспячэння жылога дома не разлічана на абаграванне дадатковых квадратных метраў, — папярэджвае начальнік юрыдычнага аддзела ЖЭУ № 3 Першамайскага раёна Аляксей Скалдзін. — Парушальніку пагражаюць значныя фінансавыя выдаткі — яму давядзецца не толькі заплаціць штраф, але і вярнуць усё ў першапачатковае становішча.
Тым не менш, некаторыя лоджыі можна зрабіць «бліжэйшымі». Напрыклад, калі лоджыя цягнецца ўздоўж двух памяшканняў — пакоя і кухні, а дзверы размешчаны ў пакоі, дапускаецца ўладкаванне дадатковага выхаду і з кухні пры наяўнасці дастатковай адлегласці паміж сцяной і акном, адзначыў спецыяліст.
Даведка
З 1 студзеня самавольнае пераабсталяванне або перапланіроўка, згодна з ч. 4 і ч. 5 арт. 22.12 Кодэкса аб адміністрацыйных правапарушэннях, караюцца штрафам у памеры:
— да 20 базавых велічынь, або 840 рублёў, калі самавольнае пераабсталяванне або перапланіроўка жылых і нежылых памяшканняў, у тым ліку інжынерных сістэм (ацяплення, гарачага і халоднага водазабеспячэння, каналізацыі, газазабеспячэння, электразабеспячэння, вентыляцыі), выканана без змянення апорнай здольнасці канструкцый;
— ад 10 да 30 базавых велічынь, або ад 420 да 1 260 рублёў, калі самавольнае пераабсталяванне або перапланіроўка прывяла да зніжэння апорнай здольнасці канструктыўных элементаў будынка, а таксама калі выканана пераабсталяванне вентыляцыйных шахт і каналаў.
Цяпер чытаюць
Той самы масажыст расказаў, навошта здымаў голых кліентак14
Каментары