Беларуска зганяла ў Парыж без візы — не знайшла там ні круасанаў, ні слімакоў. У краме «Фантазія» толькі чабурэкі

Шукаць той Парыж трэба ў Казлоўшчынскім сельсавеце Пастаўскага раёна Віцебскай вобласці. Дзяўчына, якая вядзе ў тыктоку акаўнт obzoorby, у чырвоным берэце адправілася ў самы рамантычны аграгарадок Беларусі.

Першым «парыжанінам» на яе шляху стаў дзядуля на ровары. У яго тыктокерка пацікавілася, ці можна набыць круасаны ў мясцовай краме (яна, дарэчы, мае назву «Парыж»). Той пытання не зразумеў.

— Такая булачка французская, — паспрабавала растлумачыць дзяўчына, але гэта не дапамагло.

Наступная суразмоўца была ў курсе спраў.

— На гэты момант няма ў нас тут круасанаў. Чабурэкі ёсць во ў краме «Фантазія».

— А гэта праўда, што ў Парыжы сярэдні заробак 2500 еўра?— спытала дзяўчына.

— Ну глупства. Недзе 1500 беларускіх сярэдні.

У дзяўчыны з зеленаватымі валасамі тыктокерка пацікавілася, ці далёка да Елісейскіх палёў.

— Крыху далёка, — пажартавала тая ў адказ.

Тыктокерка таксама спытала, ці каштавала калі-небудзь суразмоўца слімакоў і, пачуўшы станоўчы адказ, з максімальна сур’ёзным тварам удакладніла:

— А дзе падаюць тут?

— Самім знайсці трэба, — гэтак жа сур’ёзна адказала дзяўчына.

Паспрабавала блогерка высветліць, ці часта турысты прыязджаюць у Парыж як у горад кахання. Мясцовыя пацвердзілі, што такое бывае, але ўсё ж не надта часта.

Наведала тыктокерка і парыжскую вясковую бібліятэку. Бібліятэкарка Тэрэза Алёйзаўна, здаецца, была вельмі радая нечаканым гасцям. Яна не толькі расказала легенду пра паходжанне назвы (кажуць, быццам бы Напалеон, калі праязджаў тут падчас вайны 1812 года, сказаў, што тут «як у Парыжы»), але і пахвалілася кнігай «Парыж, зняты з неба», якую падарыў пасол Францыі ў Беларусі.

@obzoor.by ПАРИЖ БЕЗ ВИЗЫ А вы знали, что в Витебской области находится самый настоящий городок Париж? Мы решили проверить, сколько французского в местных парижанах! #обзор #париж ♬ оригинальный звук - obzoorby

— У нас тут праходзілі прыгожыя мерапрыемствы. Напрыклад, «Ралі Трактарнага завода». Вы хаця б раз у жыцці бачылі, як велізарныя трактары гуляюць у футбол?

Вядома ж, міма вясковага клуба блогерка таксама не прайшла. Там яна пацікавілася, ці прыязджае сюды французская спявачка Zaz.

Невядома, ці сапраўды супрацоўніца клуба зразумела пытанне, але паспрабавала не зганьбіць родны Парыж перад тыктокеркай з Мінску:

— Раней прыязджалі, пасёлак быў большы…

За дзень знятае з гумарам відэа набрала 155 тысяч праглядаў і каля 17 тысяч лайкаў.

А каментатары жартуюць: «О, я чуў пра напышлівыя адносіны парыжан да турыстаў. А там вельмі адкрытыя, лагодныя людзі, аказваецца, жывуць».

• 5
• 5
• 13
• 3
• 1
• 1
• 0
• 0