Беларускія міліцыянты прысутнічалі пры разгоне нямецкіх антыядзерных дэманстрацыяў.
Як паведаміў у размове зь Bild am Sonntag (нядзельным дадаткам нямецкага выданьня Bild) прэсавы сакратар МУС Нямеччыны, афэра з падрыхтоўкай беларускіх сілавікоў нямецкімі паліцыянтамі працягвалася не да 2011 году, як паведамлялася раней, а да вясны 2012. Менавіта ў гэты час у Менску з адпаведнай місіяй знаходзіўся адказны чыноўнік нямецкай памежнай паліцыі.
Раней Bild і іншыя нямецкія СМІ пісалі, што сілавыя ведамствы ФРГ займаліся падрыхтоўкай беларускіх кадраў у пэрыяд паміж 2008 і 2011 гадамі. У прыватнасьці, паведамлялася, што трэнінгі на тэрыторыі Нямеччыны праходзілі каля ста супрацоўнікаў дзяржаўных структураў Беларусі.
Беларусы прысутнічалі ў якасьці назіральнікаў на разгоне нямецкіх антыядзерных дэманстрацыяў, дзе тамтэйшыя паліцыянты ўжывалі дубінкі, вадамёты і сьлезацечны газ. Таксама нямецкія паліцыянты правялі падрыхтоўку 400 беларускіх памежнікаў, прадстаўнікоў кіраўніцтва міліцыі і крыміналістаў на тэрыторыі Беларусі.
У Бундэстагу чакаюць тлумачэньня адносна гэтай афэры ад кіраўніцтва нямецкага МУС. Пра гэта заявіў сьпікер сацыял-дэмакратычнай парлямэнцкай фракцыі Міхаэль Гартман.Паводле ягоных словаў, увесь гэты час вышэйшы заканадаўчы орган краіны ня быў праінфармаваны пра супрацу паміж нямецкімі і беларускімі сілавікамі належным чынам.
Трэба адзначыць, што першымі, хто забіў трывогу адносна супрацы былі нямецкія левыя на чале зь лідэрам партыі Грэгарам Гізі. Летась ён накіраваў адмысловы запыт ў фэдэральны ўрад, дзе надаў галоўную ўвагу падзеям 19 сьнежня 2010 і папрасіў расьсьледаваць, ці мела дачыненьне да падаўленьня тых масавых акцыяў пратэсту супраца паміж асобымі фармаваньнямі нямецкай паліцыі і беларускім АМАПам.
Цяпер чытаюць
Сілавікі завітваюць да беларусаў, якіх ужо не могуць прыцягнуць па крыміналцы за ўдзел у маршах, з маскі-шоу — для прафілактыкі2
Сілавікі завітваюць да беларусаў, якіх ужо не могуць прыцягнуць па крыміналцы за ўдзел у маршах, з маскі-шоу — для прафілактыкі
«Узнікаюць уяўленні, што палітвязні мусяць быць стойкімі, сабранымі, удзячнымі. А рэальнасць розная». Пагаварылі з людзьмі, якія водзяць дэпартаваных літаральна за руку66
Каментары