U Mieksicy va ŭzroście 80 hadoŭ pamior u balnicy adzin z najbujniejšych narkabaronaŭ u historyi Mihiel Anchiel Fieliks Haljarda, viadomy taksama jak «chrosny baćka» i «bos usich bosaŭ», piša Bi-bi-si.

U 1980‑ia hady Haljarda ŭznačalvaŭ mahutny kartel Hvadałachary, jaki daminavaŭ u mieksikanskim narkabiznesie ŭ pieryjad bumu kakainu. Haljarda stvaryŭ sajuz pamiž mieksikanskimi i kałumbijskimi złačynnymi hrupoŭkami i faktyčna źmianiŭ pryncypy kantrabandy narkotykaŭ u rehijonie. Jaho arhanizacyja supracoŭničała ź Miedeljinskim kartelem Pabła Eskabara, abjadnaŭšy vytvorčaść kakainu ŭ Andach ź pieravozkaj narkotykaŭ praź Mieksiku ŭ ZŠA.
Pavodle acenak, u peŭny pieryjad da 80% usiaho kakainu, jaki traplaŭ u ZŠA, pastaŭlaŭ Miedeljinski kartel. Haljarda i jaho arhanizacyja adyhryvali klučavuju rolu ŭ hetaj kantrabandzie. Upłyŭ kartela raspaŭsiudžvaŭsia nie tolki na złačynny śviet: na piku mahutnaści jon mieŭ vialikija mahčymaści ŭździejničać na mieksikanskuju palityku i pravaachoŭnyja orhany, kantralavaŭ cełyja sietki palicyi i pasady hubiernataraŭ u štatach.
U 1985 hodzie stanovišča kiraŭnikoŭ kartela pačało paharšacca paśla katavańniaŭ i zabojstva ahienta amierykanskaha Upraŭleńnia ŭ baraćbie z narkotykami Enrykie «Kiki» Kamareny. Jon znajšoŭ i źniščyŭ vializnuju płantacyju marychuany, jakaja naležała hrupoŭcy i znachodziłasia ŭ štacie Čychuachua. Zabojstva ahienta stała pryčynaj adnoj z najbujniejšych u historyi Paŭnočnaj Amieryki apieracyj uładaŭ ZŠA pa vyšuku złačyncaŭ.
U 1989 hodzie Haljarda aryštavali i prysudzili da praciahłaha turemnaha źniavoleńnia. Z taho času jon znachodziŭsia pad vartaj. U 2022 hodzie praz paharšeńnie zdaroŭja jaho płanavali pieravieści pad chatni aryšt, ale heta nie adbyłosia praz techničnyja prablemy z elektronnym branzaletam. U vyniku jon pamior u balnicy rodnaha horada Hvadałachara, kudy jaho špitalizavali ŭ pačatku tydnia. Padčas znachodžańnia ŭ balnicy terytoryju vakoł jaje achoŭvała mieksikanskaja turemnaja palicyja.
U 1980‑ia hady z Haljardam paznajomiŭsia Chaakin «El Čapa» Husman. Narkabaron daručyŭ jamu zajmacca łahistykaj svajoj arhanizacyi. Paśla aryštu Haljarda jahony kartel raspaŭsia, a na jaho asnovie ŭźnikła niekalki novych złačynnych struktur. Adnoj ź ich staŭ kartel Sinałoa, jaki ŭznačaliŭ Husman.
U 2019 hodzie paśla adnaho z samych hučnych sudovych pracesaŭ u sučasnaj historyi ZŠA Husmana prysudzili da pažyćciovaha źniavoleńnia. Jaho pryznali vinavatym, u tym liku, u narkatrafiku i admyvańni hrošaj.
Žyćcio Haljarda stała asnovaj dla niekalkich televizijnych prajektaŭ, u tym liku sieryjała Netflix «Narkas: Mieksika», dzie pakazanyja jaho šlach da viaršyni złačynnaj ijerarchii i adnosiny z El Čapam.
Ciapier čytajuć
«Dajcie kruhłuju sumu i hod — budzie vam luby šedeŭr Mikiełandžeła!» Ułady zapatrabavali pierarabić «Bychaŭskuju madonnu». Aŭtar padtočvaje jaje bałharkaj
«Dajcie kruhłuju sumu i hod — budzie vam luby šedeŭr Mikiełandžeła!» Ułady zapatrabavali pierarabić «Bychaŭskuju madonnu». Aŭtar padtočvaje jaje bałharkaj
Dyrektar Viciebskaha centra sučasnaha mastactva Andrej Duchoŭnikaŭ pierajechaŭ u Sierbiju — jon raskazaŭ pra danosy ŭ kultury, nieadukavanaść ministraŭ i čyj ža Šahał
Kamientary
A sieryjał dobra zrobleny