U Śvietłahorskim rajonie płanujuć rekanstrujavać celułozna-kardonny kambinat, dadaŭšy novyja vytvorčyja mahutnaści i palihon dla pramysłovych adkidaŭ. Pra heta paviedamiŭ Śvietłahorski rajvykankam, jaki abviaściŭ hramadskija abmierkavańni spravazdačy ab acency ŭździejańnia na navakolnaje asiarodździe. Jany ŭžo pačalisia i praciahnucca da 11 śniežnia, piša «Fłahštok».

Śvietłahorski CKK i raniej vyklikaŭ niezadavolenaść miascovych žycharoŭ: na praciahu niekalkich hadoŭ jany skardziacca na pieryjadyčny rezki i jedki smurod, jaki ŭźnikaje praz vykidy pradpryjemstva. Ciapier u vyniku rekanstrukcyi mohuć źjavicca novyja krynicy taksičnych vykidaŭ.
Da 25 listapada žychary mohuć padać zajavy z prapanovaj pravieści schod dla abmierkavańnia spravazdačy ab acency ŭździejańnia na navakolnaje asiarodździe, a taksama zajavić pra namier pravieści hramadskuju ekałahičnuju ekśpiertyzu.

Prajekt praduhledžvaje budaŭnictva palihona dla zachoŭvańnia pramysłovych adkidaŭ Śvietłahorskaha CKK, jakija nielha vykarystoŭvać, a taksama novaj linii vytvorčaści bielenaj i niabielenaj celułozy mahutnaściu 200 tysiač ton za hod. Akramia taho, płanujecca ŭźvieści aŭtamatyzavanuju technałahičnuju liniju papiarovaj mašyny dla vypusku miaškovaj papiery mahutnaściu 160 tysiač ton za hod.
Novyja abjekty raźmieściać na terytoryi ŭžo najaŭnaha pramysłovaha kompleksu kambinata. Palihon źbirajucca pabudavać na paŭdniovy ŭschod ad Śvietłahorska, na poŭdzień ad Śvietłahorskaha CKK i pradpryjemstva «ŚvietłahorskChimvałakno». Z paŭdniovaha boku da adviedzienaha pad jaho ŭčastka prymykaje haradski palihon ćviordych kamunalnych adkidaŭ, jaki znachodzicca prykładna za čatyry kiłamietry ad Śvietłahorska, la šašy Rečyca — Paryčy.
Najbližejšaja žyłaja zabudova — vioska Jakimava Słabada — raźmieščanaja za 2,5 kiłamietra na paŭnočny ŭschod ad miažy terytoryi, adviedzienaj pad palihon. Prykładna za 2,2 kiłamietra na paŭnočny zachad znachodziacca sadovyja i aharodnyja ŭčastki na Zavodskaj vulicy ŭ Śvietłahorsku.
Novuju liniju dla vytvorčaści bielenaj i niabielenaj celułozy płanujuć raźmiaścić u paŭdniovaj častcy ciapierašniaj pramysłovaj placoŭki kambinata. Jana miažuje z terytoryjaj «ŚvietłahorskChimvałakna», Zavodskaj vulicaj i inšymi vytvorčymi ŭčastkami CKK. Biržu bałansaŭ i ačyščalnyja zbudavańni źbirajucca raźmiaścić na susiedniaj terytoryi na ŭschod ad ciapierašniaj biržy bałansaŭ. Z poŭdnia, poŭnačy i zachadu hety ŭčastak miažuje ź sielskahaspadarčymi ziemlami i lasnymi masivami.
Cech dla vytvorčaści papiery płanujuć pabudavać u zachodniaj častcy dziejnaha pradpryjemstva. Najbližejšaja žyłaja zabudova ŭ Jakimavaj Słabadzie znachodzicca bolš čym za 540 mietraŭ ad miažy budučaha abjekta. Za Zavodskaj vulicaj, na adlehłaści bolš za 100 mietraŭ, raźmieščanyja sadovyja i aharodnyja nadzieły.
Rašeńnie ab realizacyi prajekta pavinny pryniać da 5 lutaha 2027 hoda.
Ciapier čytajuć
«Dajcie kruhłuju sumu i hod — budzie vam luby šedeŭr Mikiełandžeła!» Ułady zapatrabavali pierarabić «Bychaŭskuju madonnu». Aŭtar padtočvaje jaje bałharkaj
«Dajcie kruhłuju sumu i hod — budzie vam luby šedeŭr Mikiełandžeła!» Ułady zapatrabavali pierarabić «Bychaŭskuju madonnu». Aŭtar padtočvaje jaje bałharkaj
Dyrektar Viciebskaha centra sučasnaha mastactva Andrej Duchoŭnikaŭ pierajechaŭ u Sierbiju — jon raskazaŭ pra danosy ŭ kultury, nieadukavanaść ministraŭ i čyj ža Šahał
Kamientary