U Sieńnienskim rajonie pradajuć z aŭkcyjona staradaŭniuju paštovuju stancyju
U Viciebskaj vobłaści na aŭkcyjon užo nie pieršy raz vystavili redki pomnik darožnaj architektury — staruju paštovuju stancyju siaredziny XIX stahodździa ŭ vioscy Pahrabienka Sieńnienskaha rajona. Kaliści jana raźmiaščałasia na trakcie Sankt-Pieciarburh — Kijeŭ. Niahledziačy na status historyka-kulturnaj kaštoŭnaści, pačatkovy košt łota składaje ŭsiaho 135 rubloŭ. Aŭkcyjon pryznačany na 15 śniežnia, piša Domovita.by.

Kupcu prapanujuć nabyć adnapaviarchovy cahlany stancyjny dom płoščaj kala 115 kvadratnych mietraŭ z prybudovaj, mietaličnym dacham i butavym padmurkam. Razam ź im pradajecca pałova cahlanaha flihiela dla furmanaŭ płoščaj 74,3 kvadratnaha mietra. Jaho pabudavali ŭ 1840 hodzie na butabietonnym padmurku.

Architektura stancyi vyłučajecca elemientami nieahotyki, što było redkaściu dla biełaruskaj pravincyi XIX stahodździa. Hałoŭny fasad, źviernuty da darohi, upryhožany hatyčnymi śpičastymi voknami, takim ža ŭvachodnym partałam i čyhunnym naviesam. Unutry budynak maje pramavuholnuju płaniroŭku: u centry raźmiaščalisia siency, a pa bakach — pakoi dla padarožnikaŭ i kvatera nahladčyka.
Na terytoryi taksama zachavalisia reštki śvirna, chlava, pierabudavanaj stajni i cahlanaj aharodžy z dvuma simietryčnymi prajezdami, adzin ź jakich zakładzieny.
Ziamielny nadzieł płoščaj 0,2267 hiektara pieradajecca ŭ arendu na 43 hady biez asobnaha aŭkcyjonu. Pakupnik atrymaje 161/200 doli ŭ pravie arendy.
Paštovy kompleks u Pahrabiency pabudavali jak stancyju treciaha razradu pavodle typavoha prajekta na trakcie Sankt-Pieciarburh — Kijeŭ. Učastak šašy pamiž Viciebskam i Oršaj adkryli ŭ 1841 hodzie. Paštovyja stancyi raźmiaščalisia praz kožnyja 20—30 viorstaŭ. Tam mianiali koniej, sartavali karespandencyju i davali adpačyć čynoŭnikam, dypłamatam i kurjeram.
Praca stancyi rehulavałasia strohimi praviłami. Usich padarožnikaŭ zapisvali ŭ śpiecyjalnyja knihi, adznačajučy ich čyn, metu pajezdki i čas prybyćcia. Za parušeńnie hrafika furman moh stracić pracu.

Ciapier kompleks kala darohi R87 zastajecca adnym ź niešmatlikich zachavanych u Biełarusi ŭzoraŭ darožnaj architektury taho času.
U saviecki čas stancyja straciła svajo pieršapačatkovaje pryznačeńnie. Spačatku ŭ budynku pracavała viaskovaja krama, paźniej jaho zaniała liniejnaja darožnaja słužba.

Znajści novaha ŭładalnika dla staroj stancyi sprabujuć užo niekalki hadoŭ. U kancy 2019 hoda jaje rynkavy košt aceńvali na 36 tysiač rubloŭ, a na aŭkcyjon budynak vystavili za 38 595 rubloŭ. Paŭtornyja tarhi pravodzilisia ŭ 2022 hodzie i paźniej, ale kupcoŭ nie znajšłosia. U vyniku pačatkovy košt źnizili da 135 rubloŭ.

Novy ŭładalnik nie zmoža prosta nabyć budynak i pakinuć jaho biez vykarystańnia. Na praciahu hoda paśla padpisańnia damovy jon pavinien zakazać raspracoŭku prajektna-kaštarysnaj dakumientacyi. Restaŭracyju nieabchodna budzie zakončyć u terminy, vyznačanyja prajektam, ale nie paźniej čym praź piać hadoŭ paśla nabyćcia.
Zajaŭki na ŭdzieł u aŭkcyjonie prymajuć da 10 śniežnia. Sami tarhi adbuducca 15 śniežnia.
Kamientary