Zialenski prapanavaŭ raźmiaścić amierykanskija i jeŭrapiejskija vojski va Ukrainie paśla zakančeńnia vajny
«Što buduć rabić partniory, kali — navat nie «kali», a «paśla taho, jak heta adbudziecca» — Rasija pasprabuje znoŭ napaści?» — zadaŭsia pytańniem prezident Ukrainy.

ZŠA i jeŭrapiejskija krainy pavinny raźmiaścić svaje vojski va Ukrainie ŭ ramkach harantyj biaśpieki, jakija amierykanski bok prapanuje zrabić anałahičnymi artykułu 5 Statuta NATA ab kalektyŭnaj abaronie. Pra heta zajaviŭ prezident Ukrainy Uładzimir Zialenski, piša UNIAN.
«Na moj pohlad, častkaj realnych harantyj pa prykładzie artykuła 5 pavinna stać prysutnaść sił i baz Złučanych Štataŭ i jeŭrapiejskich partnioraŭ. Biez hetaha, miarkuju, naŭrad ci možna kazać pra artykuł 5 ci niešta padobnaje», — skazaŭ Zialenski žurnalistam u Bierlinie.
Jon padkreśliŭ, što Ukraina zacikaŭlenaja ŭ fizičnaj prysutnaści amierykanskich vojskaŭ na svajoj terytoryi — pa anałohii z krainami Blizkaha Uschodu, dzie ZŠA majuć svaje vajennyja bazy.
Pry hetym, pavodle jaho słoŭ, pakul niama adzinaha razumieńnia taho, što buduć aznačać harantyi biaśpieki dla Kijeva biez ustupleńnia ŭ Paŭnočnaatłantyčny aljans.
«Što buduć rabić partniory, kali — navat nie «kali», a «paśla taho, jak heta adbudziecca» — Rasija pasprabuje znoŭ napaści? Heta pavinna być zrazumieła nie tolki partnioram, ale i hramadstvu, inviestaram, jakija pryjduć va Ukrainu. Im patrebnyja dakładnyja adkazy», — adznačyŭ Zialenski.
Kamientary