БХД патрабуе спыніць катаванні ў дачыненні да Мікалая Аўтуховіча
Аргкамітэт па стварэнні партыі «Беларуская хрысціянская дэмакратыя» выказвае абурэнне дзеяннямі адміністрацыі турмы № 1 у Гродне, у выніку якіх палітзняволены Мікалай Аўтуховіч быў вымушаны скарыстаць крайнія меры, каб супрацьстаяць націску, паведамляе прэс-служба арганізацыі.
Нагадаем, сёння прыватная культурна-асветная ўстанова Platform Innovation распаўсюдзіла інфармацыю са спасылкай на канфідэнцыяльную крыніцу ў гродзенскай турме аб тым, што Аўтуховіч нанёс сябе цяжкія цялесныя пашкоджанні — у знак пратэсту парэзаў лязом жывот.
Прычынай стала здзеклівае стаўленне адміністрацыі турмы да асуджанага. Паводле звестак крыніцы, цяпер Аўтуховіч адчувае сябе нармальна, ён пераведзены назад у камеру, стан яго здароўя здавальняе.
Аргкамітэт БХД «расцэньвае дзеянні ў дачыненні да вязня як катаванні». «Мы лічым, што поўная адказнасць за тое, што здарылася, ляжыць на адміністрацыі турмы, і нагадваем, што ў Крымінальным кодэксе Беларусі ёсць артыкул «Давядзенне да самагубства», — заяўляюць у арганізацыі.
БХД патрабуе неадкладна спыніць катаванні ў дачыненні да Аўтуховіча, вызваліць яго, а таксама прыцягнуць да крымінальнай адказнасці кіраўніцтва турмы.
Акрамя таго, БХД заклікае беларускую грамадзянскую супольнасць і міжнародныя арганізацыі патрабаваць спынення катаванняў у Беларусі і вызвалення Аўтуховіча, а таксама іншых палітзняволеных.
Выпадак з Аўтуховічам, адзначаюць у БХД, «выразна ілюструе той факт, што ў Беларусі адсутнічае дэмакратызацыя і паляпшэнне сітуацыі, але працягваецца метадычнае знішчэнне апанентаў дзейнага рэжыму».
Мікалай Аўтуховіч, грамадскі актывіст і ветэран афганскай вайны, быў арыштаваны 8 лютага 2009. За перавозку і захоўванне пяці патронаў да паляўнічай вінтоўкі Вярхоўны суд у маі 2010 прызнаў яго вінаватым на падставе арт. 295, ч. 3 КК (незаконныя дзеянні ў дачыненні да агнястрэльная зброі, боепрыпасаў і выбуховых рэчываў) і прыгаварыў да пяці гадоў і двух месяцаў пазбаўлення волі ва ўмовах строгага рэжыму.
Аўтуховіч павінен выйсці на волю ў красавіку 2014 года.
Цяпер чытаюць
Што вядома пра віцебчука, якога вінавацяць у спробе падрыву самалёта ў Германіі5
Каментары