У Віцебскім заапарку стала на аднаго птушынага насельніка больш. З Полацкага раёна сюды прывезлі чорнага бусла, які аказаўся зусім не тым, за каго яго выдавалі, піша sb.by
«Менавіта так, як рэдкую чырванакніжную птушку, яго на днях і вызначылі да нас», — сказала дырэктар заапарку Ірына Арлова. Прыгледзеўшыся ўважлівей, спецыялісты змянілі меркаванне. Заключэнне мінскіх арнітолагаў адназначнае: бусел не чорны, а белы, самы распаўсюджаны ў Беларусі.
У зман усіх увёў колер апярэння, дэталізуе Уладзімір Куксёнак, начальнік Наваполацкай гарадской і раённай інспекцыі прыродных рэсурсаў і аховы навакольнага асяроддзя:
— Пра тое, што птушка не проста адбілася ад чарады, а наогул не можа лётаць, нам паведамілі ўсхваляваныя жыхары вёскі Двор-Саланевічы. Выехаўшы на месца, мы пераканаліся, што без умяшання чалавека не абысціся. Небараку, што не мог лётаць, прыйшлося вылавіць і адправіць у заапарк.
Уладзімір Дзмітрыевіч пацвердзіў: спярша яны вырашылі, што выратавалі ад немінучай гібелі рэдкі, чырванакніжы экзэмпляр. Але прадстаўнікі грамадскай арганізацыі «Ахова птушак Бацькаўшчыны», да якіх эколагі звярнуліся па кансультацыю, запэўнілі: выйшла памылка. На справе птушка не ў Чырвонай кнізе, а ў чымсьці падобным на мазут, хоць яго характэрнага паху і няма.
Ірына Арлова запэўніла, што зараз бусел адчувае сябе добра і чакае цёплых дзянькоў, каб прыняць водныя, «адбельвальныя», працэдуры. Мяркуюць, што птушка перазімуе ў Віцебску, а потым зможа паляцець на волю.
«Сумны горад, пра які прынята добра казаць». Расіянка раскрытыкавала Мінск — беларусы ёй іранічна падзякавалі26
Каментары