Чувашскага актывіста абвясцілі ў Расіі «іншаагентам», ён арыгінальна выказаў свой пратэст
21 кастрычніка ў Расіі прызналі «іншаагентам» чувашскага актывіста, прыхільніка Аляксея Навальнага Сямёна Кочкіна. У адказ на гэта ён зрабіў арыгінальны крок.
У Расіі тыя, хто прызнаецца «іншаагентамі», як СМІ, так і фізічныя асобы, мусяць пазначаць свой кантэнт адмысловым здзеклівым кляймом — вялікімі літарамі ў пачатку тэксту напісаць спецыяльна зацверджаную формулу, у якой чытачы папярэджваюцца, што напісаная ніжэй інфармацыя створаная «іншаагентам».
Сямён Кочкін, даведаўшыся пра свой новы статус, таксама паставіў у сябе такое кляймо, але дэманстратыўна пераклаў яго на чувашскую мову.
Праўда, Кочкін цяпер вымушана знаходзіцца за межамі Расіі, як таксама і іншы нацыянальны актывіст, прызнаны «іншаагентам» адначасова з ім — Руслан Габасаў з Башкартастана.
Чувашы — паўтарамільённы народ, радзіма якога — Паволжа. Гэта адзін з найбуйнейшых народаў Расіі, з карэнных народаў ён саступае па колькасці, апрача рускіх, толькі татарам, башкірам і чачэнцам. Чувашская мова — цюркская, але вельмі спецыфічная. Гэта адзіная жывая мова з булгарскай групы цюркскіх моў, астатнія мовы з гэтай групы даўно вымерлі. Таму чувашскай мовы іншыя цюркі амаль не разумеюць, у тым ліку і найбліжэйшыя суседзі чувашоў — татары і башкіры.
Каментары
ru.wikipedia.org/wiki/Флаг_Чувашии
я ўсё думала, што арнамент упершыню ў гісторыі з'явіўся на флаге бсср. ан не... у іх ужо быў...