Лідары правацэнтрысцкай кааліцыі — старшыня руху «За свабоду» Юрый Губарэвіч, сустаршыня БХД Віталь Рымашэўскі і в.а. старшыні АГП Мікалай Казлоў — правялі сёння прэс-канферэнцыю, на якой распавялі пра планы і бягучую дзейнасць, паведамляе прэс-служба руху «За свабоду»
«Наш супольны курс на сумесную працу застаецца нязменным. Адно з асноўных пытанняў, якое стаіць перад намі — падрыхтоўка да прэзідэнцкіх выбараў 2020 году. Мы пачынаем рыхтавацца па некалькіх кірунках, і гэта не толькі абранне адзінага кандыдата», — адзначыў Юрый Губарэвіч.
Ён пацвердзіў, што правацэнтрысты не будуць распыляцца, і кандыдат будзе адзіным. «Тое, над чым мы працуем зараз — гэта праграма для адзінага кандыдата. Гэта не менш важна», — падкрэсліў палітык. Агульная колькасць тэмаў для праграмы — больш за дзясятак: мясцовае самакіраванне, пенсійная рэформа, ахова здароўя, адукацыя, выбарчае заканадаўства і г.д.
Губарэвіч лічыць, што прэзідэнцкія выбары — гэта ў нейкай ступені інструмент, што гэта магчымасць паказаць людзям, што ёсць альтэрнатыва, што можна жыць па-іншаму, чым зараз. «Нам важна аб’яднанне. Патэнцыял у правацэнтрысцкай кааліцыі ёсць», — адзначыў палітык, дадаўшы, што яны чакаюць далучэння іншых прадстаўнікоў дэмсілаў.
Праграма для кандыдата будзе гатовая ўжо ў наступным годзе. «На сёння мы вядзем перамовы, як будзе выглядаць працэдура абрання адзінага. Пачатак наступнага году мы можам казаць пра запуск працэдуры і наступны выхад на адзінага кандыдата ад правацэнтрыстаў», — дадаў ён.
Губарэвіч упэўнены, што правацэнстрысцкая кааліцыя збярэ неабходных 100 тысячаў подпісаў.
Каментары