Ідэолаг «Беларуськалія» патлумачыла, чаму запыталася ў Качанавай пра беларускую мову на тэлебачанні
Адміністрацыя прэзідэнта паставіла айчынным тэлеканалам задачу — мець не менш за 30% кантэнту на беларускай мове. Пра гэта заявіла кіраўніца Адміністрацыі Наталля Качанава на сустрэчы з работнікамі «Беларуськалія».
Чытайце.
Качанава заявіла, што не менш за 30% кантэнту тэлеканалаў павінна выходзіць на беларускай мове? Эйсмант: Не, журналісты наблыталі
«Наша Ніва» праверыла гэтую інфармацыю ў Наталлі Навіцкай — начальніцы аддзела ідэалогіі «Белкалія», якая і задавала пытанне.
Як яно гучала?
«Я пыталася не зусім пра мову на каналах. Я сказала, што вось ёсць праграма «Добрай раніцы, Беларусь». І было б выдатна, каб хаця б раз у тыдзень яна была па-беларуску. Я люблю нашу мову, яе прыемна слухаць — прыгожую, правільную мову. Гэта быў бы нейкі добры адукацыйны праект нават, бо раніцай калі мы і не глядзім тэлевізар, то прынамсі слухаем, і людзі б чулі мову больш, чым чуюць у рэальным жыцці. Ну і гасцям нашай краіны было б прыемна паслухаць беларускую мову, калі яны ўключаць тэлевізар у гасцях. Я неяк раней не задумвалася, але калі мая дачка прыйшла з садка і пачала гаварыць па-беларуску, то мне так спадабалася… І ва ўніверсітэт яна здавала беларускую мову!» — патлумачыла Наталля Навіцкая.
Яна кажа, што дакладны адказ Качанавай ужо не ўспомніць, але, маўляў, тая сказала, што прапанова слушная і над гэтым ужо працуюць.
«Вельмі шмат расказвала і пра беларускія традыцыі», — апісала выступ Качанавай ідэолаг «Белкалія».
«А што мы на сваім прадпрыемстве робім? Вось у гэты момант перакладаем сайт на беларускую мову. У нас 11 дзіцячых садкоў, там прадугледжаныя абавязковыя заняткі па-беларуску. Усе рабочыя бланкі ў нас дублююцца [на дзвюх мовах], праўда, запаўняем збольшага па-руску. Таксама наш калектыў рэгулярна выязджае на розныя адукацыйныя і культурніцкія мерапрыемствы. Напрыклад, на Купалле ў нас усё па-беларуску», — запэўніла Наталля Навіцкая.
Пашпарты беларусаў, якія галасуюць на выбарах у КР, апрацуе кампанія, у якой апошнюю ўцечку выявілі ў 2026-м, а заснавальнікі — расіяне63
Каментары