Мікіту Мелказёрава захэйцілі за беларускую мову. А ён пачаў яе ўсур'ёз вучыць!
Нядаўна ютуб-блогер Мікіта Мелказёраў абвесціў чэлендж: калі на яго інстаграм падпішацца 30 тысяч чалавек, зробіць выпуск па-беларуску. Многія ўспрынялі гэта крытычна, маўляў, проста так па-беларуску блогер і гаварыць не можа. Мелказёраў казаў, што ўпершыню сутыкнуўся з такім хэйтам. І знайшоў людзей, якія вучаць яго беларускай мове.
«У мяне ў школе былі вельмі прафесійныя настаўнікі. Таму я разумею, што ў мяне добрая база і я даволі таленавіты ў тым, што тычыцца моваў. Але ёсць праблема з сістэмнымі рэчамі. Як і з любой мовай, павінна быць практыка, — тлумачыць Мікіта. —
Калі ўзнік той вэрхал першапачатковы, акрамя хэйту было і шмат падтрымкі. Мне напісалі каля 10 чалавек, якія сказалі: эгей, хлопча, калі ты хочаш практыкавацца, мы можам з табой размаўляць.
На гэтым тыдні якраз і пачалі.
Ёсць дзве дзяўчыны, якія размаўляюць са мной па-беларуску, калі ў іх ёсць вольны час, па гадзіне ў дзень. Яны робяць нататкі і пасля пішуць, што было не так. Вось такі экспрэс-курс.
Беларускую я больш-менш ведаю, але быў псіхалагічны блок, каб на ёй размаўляць. Мы працуем са слоўнікам, з русізмамі і нейкім адчуваннем перфекцыянізму. Напрыклад, слова «хацець» — мне здаецца, што гэта калька з рускай мовы і трэба падабраць іншае. Мне патлумачылі, што па першасці можна ўжываць наркамаўку, а тарашкевіца, якая больш літаратурная, — гэта крок на будучыню».
Апроч заняткаў, блогер глядзіць кіно па-беларуску і стараецца часцей перапісвацца на роднай мове. Кажа, у каманды «Жизнь-малины» ёсць мэта — рабіць раз на месяц беларускамоўны выпуск інтэрв’ю.
Дарэчы, да 30 тысяч падпісчыкаў у інстаграме Мікіта пакуль не дайшоў, засталося сабраць яшчэ 2000 падпісак.
Чытайце таксама:
«З такім аб’ёмам хэйту сутыкнуўся ўпершыню». Мелказёраў паабяцаў за падпіску выпусціць відэа па-беларуску — і атрымаў шмат крытыкі
Хто той палітвязень з Іванава, які выплаціў $600 тысяч кампенсацыі за данаты і ўсё адно атрымаў вялікі тэрмін?12
Хто той палітвязень з Іванава, які выплаціў $600 тысяч кампенсацыі за данаты і ўсё адно атрымаў вялікі тэрмін?
«На працягу 30 гадоў незалежнасці беларускамоўныя бюлетэні задавальнялі ўсіх». Камуністы абвінавацілі Бондараву ў распальванні варожасці на моўнай глебе1616
Каментары