Беларускія акцёры, якія сыгралі галоўныя ролі ў нямецка-аўстрыйскім фільме, атрымалі ўзнагароды на кінафестывалі ў Лакарна
Сам фільм, які часткова здымалі ў Беларусі, таксама адзначаны журы.
16 жніўня ў швейцарскім горадзе Лакарна адбылася цырымонія закрыцця і ўручэння ўзнагарод аднаго з самых прэстыжных міжнародных кінафестываляў. У асноўным конкурсе быў прадстаўлены фільм «Белы слімак» — сумесная праца аўстрыйска-нямецкага рэжысёрскага дуэта Эльзы Кремсер і Левіна Петэра. Стужка прысвечаная гісторыі кахання ў сучаснай Беларусі.
Фільм быў высока ацэнены журы і атрымаў дзве ўзнагароды: спецыяльны прыз журы (другая па значнасці ўзнагарода фестывалю) і прыз за акцёрскую ігру, які быў уручаны выканаўцам галоўных роляў — Марыі Імбро і Міхаілу Сянькову.
Фільм распавядае гісторыю кахання двух аўтсайдараў, якія перакульваюць светы адно аднаго з ног на галаву. Адначасова — гэта даследаванне адзіноты, якое пранізвае сучаснае жыццё, і тых тонкіх нітак, якія звязваюць і руйнуюць чалавечыя адносіны, піша Reform.
Героі фільма — маладая мадэль Маша, якая марыць пра кар’еру ў Кітаі, і мастак і працаўнік морга Міша.
«Наш фільм — пра пераломны момант. Ці гэта адносіны двух персанажаў ці найноўшая гісторыя Беларусі: гаворка ідзе пра нявырашаныя пытанні, звернутыя ў яшчэ не разгаданую будучыню», — кажуць пра свой фільм рэжысёры.
Для здымачнай групы, якая складаецца з прафесіяналаў з некалькіх краін, здымкі ў Беларусі сталі беспрэцэдэнтным вопытам, яны патрабавалі пастаяннай абачлівасці, каб пазбегнуць непажаданай увагі. Падрыхтоўка і самі здымкі занялі дзесяць гадоў.
Цяпер чытаюць
З праекта будаўніцтва мінскага метро выкінулі яшчэ дзве станцыі — «Кіеўскі сквер» і «Політэхнічную»5
Каментары